ദുൽഖറിനെ കടത്തിവെട്ടി നിവിൻ പോളിയുടെ പുതിയ റെക്കോർഡ്

കഴിഞ്ഞ ദിവസമാണ് യുവ താരം നിവിൻ പോളി നായകനായ പടവെട്ട്‌ എന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തത്. ഇനിയും ഷൂട്ടിംഗ് പൂർത്തിയായിട്ടില്ലാത്ത ഈ ചിത്രം രചിച്ചു സംവിധാനം ചെയ്യുന്നത് നവാഗതനായ ലിജു കൃഷ്നയും ഈ ചിത്രം നിർമ്മിക്കുന്നത് പ്രശസ്ത യുവ താരമായ സണ്ണി വെയ്‌നുമാണ്. സണ്ണി വെയ്ൻ പ്രൊഡക്ഷൻസിന്റെ ബാനറിൽ അദ്ദേഹം ആദ്യമായി നിർമ്മിക്കുന്ന ഈ ചിത്രത്തിൽ അദ്ദേഹവും അഭിനയിക്കുന്നുണ്ട്. ലേഡി സൂപ്പർ സ്റ്റാർ മഞ്ജു വാര്യർ അതിഥി വേഷത്തിൽ എത്തുന്ന ഈ ചിത്രത്തിലെ നായികാ വേഷം ചെയ്യുന്നത് അരുവി എന്ന സൂപ്പർ ഹിറ്റ് തമിഴ് ചിത്രത്തിലൂടെ ശ്രദ്ധ നേടിയ നായികയായ അദിതി ബാലൻ ആണ്. സൂര്യ ഫിലിംസ് വിതരണം ചെയ്യാൻ പോകന്ന ഈ ചിത്രത്തിൽ ഷമ്മി തിലകന്‍, ഷൈന്‍ ടോം ചാക്കോ, ഇന്ദ്രന്‍സ്, സുധീഷ്, വിജയരാഘവന്‍ എന്നിവരും അഭിനയിക്കുന്നുണ്ട്. ഏതായാലും ഇന്നലെ റിലീസ് ചെയ്ത ഇതിന്റെ ഫസ്റ്റ് ലുക്ക് പോസ്റ്ററിന് ഗംഭീര പ്രേക്ഷക പ്രതികരണമാണ് ലഭിച്ചിരിക്കുന്നത്.

നിവിൻ പോളി ആരാധകർ ഈ ഫസ്റ്റ് ലുക്ക് പോസ്റ്റർ റിലീസ് ആഘോഷിച്ചത് ട്വിറ്ററിൽ ഒരു പുതിയ ഹാഷ് ടാഗ് റെക്കോർഡ് സൃഷ്ടിച്ചു കൊണ്ടാണ്. #PadavettuFL എന്ന അവരുടെ ടാഗ് ഏറ്റവും കൂടുതൽ ട്വീറ്റ് ചെയ്യപ്പെടുന്ന മലയാളം സിനിമാ പോസ്റ്റർ ടാഗ് ആയി മാറി. ദുൽഖർ സൽമാൻ ചിത്രമായ കുറുപ്പിന്റെ സെക്കന്റ് ലുക്ക് പോസ്റ്റർ ടാഗ് സൃഷ്‌ടിച്ച റെക്കോർഡ് ആണ് ഈ നിവിൻ പോളി ചിത്രം തകർത്തത്. #KurupSecondLook എന്ന ഹാഷ് ടാഗ് 136.5k ട്വീറ്റുകൾ നേടിയപ്പോൾ പടവെട്ട്‌ ഹാഷ് ടാഗ് നേടിയത് 250.4 K ആണ്. മമ്മൂട്ടി, മോഹൻലാൽ എന്നിവരുടെ ദി പ്രീസ്റ്റ്, മരക്കാർ എന്നീ ചിത്രങ്ങളുടെ ഫസ്റ്റ് ലുക്ക് ഹാഷ് ടാഗുകളും ഇതിനു പുറകിലാണ് സ്ഥാനം പിടിച്ചിരിക്കുന്നത്. വമ്പൻ ബഡ്ജറ്റിൽ ഒരുങ്ങുന്ന ഈ ചിത്രം കൂടാതെ രാജീവ് രവിയുടെ തുറമുഖം, നവാഗത സംവിധായകർ ഒരുക്കുന്ന ബിസ്മി സ്പെഷ്യൽ, ഗ്യാങ്സ്റ്റർ ഓഫ് മുണ്ടന്‍മല എന്നിവയാണ് ഇനി വരാനുള്ള നിവിൻ പോളി ചിത്രങ്ങൾ.