തലൈവർക്കൊപ്പം പ്രേക്ഷക മനസ്സ് കീഴടക്കി നിവേദ തോമസിന്റെ അതിഗംഭീര പെർഫോമൻസ്

കഴിഞ്ഞ ദിവസം ആണ് സൂപ്പർ സ്റ്റാർ രജനികാന്ത് നായകനായി എത്തിയ ദർബാർ ലോകം മുഴുവൻ റിലീസ് ചെയ്തത്. എ ആർ മുരുഗദോസ് സംവിധാനം ചെയ്ത ഈ ചിത്രം സമ്മിശ്ര പ്രതികരണം ആണ് നേടുന്നത് എങ്കിലും ഗംഭീര ബോക്സ് ഓഫീസ് കളക്ഷൻ ആണ് നേടുന്നത്. തലൈവരുടെ കിടിലൻ പ്രകടനവും ചിത്രത്തിന്റെ മാറ്റു കൂട്ടുന്നു. എന്നാൽ ലേഡി സൂപ്പർ സ്റ്റാർ നയൻ താര നായികാ വേഷത്തിൽ എത്തിയിട്ടും ഈ ചിത്രത്തിൽ തലൈവർക്കൊപ്പം പ്രേക്ഷകരുടെ കയ്യടി നേടുന്നതും മനസ്സു കീഴടക്കിയതും മലയാളി നടി ആയ നിവേദ തോമസ് ആണ്. രജനികാന്ത് അവതരിപ്പിക്കുന്ന ആദിത്യ അരുണാചലം എന്ന പൊലീസ് ഓഫീസർ ആയ കേന്ദ്ര കഥാപാത്രത്തിന്റെ മകൾ ആയാണ് നിവേദ ഈ ചിത്രത്തിൽ അഭിനയിക്കുന്നത്.

വള്ളി എന്നാണ് ഈ ചിത്രത്തിൽ നിവേദ അവതരിപ്പിക്കുന്ന കഥാപാത്രത്തിന്റെ പേര്. ഈ അച്ഛൻ- മകൾ കഥാപാത്രങ്ങളുടെ ബന്ധം ആണ് ചിത്രത്തിന് ആവശ്യമായ വൈകാരിക തലം നൽകുന്നത്. ഇവർ ഒരുമിച്ചുള്ള രംഗങ്ങൾ എല്ലാം തന്നെ അത്യന്തം ഹൃദയ സ്പർശിയും അതിഗംഭീരവും ആണ്. ഗംഭീര പ്രകടനം ആണ് ഈ ചിത്രത്തിൽ നിവേദ കാഴ്ച്ച വെച്ചിരിക്കുന്നത് എന്നു എല്ലാ പ്രേക്ഷകരും ഒരുപോലെ ആണ് പറയുന്നത്. തലൈവർക്കൊപ്പം നിന്നു കൊണ്ട് പ്രേക്ഷകരുടെ കയ്യടി നേടിയെടുക്കുക എന്നത് ഒരു വലിയ കാര്യം തന്നെയാണ്. ആ നേട്ടമാണ് നിവേദയെ തേടി എത്തിയിരിക്കുന്നത്. ഈ പ്രകടനം സൗത്ത് ഇന്ത്യൻ സിനിമയിൽ തന്നെ വലിയ ഒരു ബ്രേക്ക് ഈ നടിക്ക് നേടിക്കൊടുക്കും എന്നുറപ്പാണ്. ലൈക്ക പ്രൊഡക്ഷൻസ് നിർമ്മിച്ച ഈ ചിത്രത്തിൽ ബോളിവുഡ് താരം സുനിൽ ഷെട്ടി ആണ് വില്ലൻ ആയി എത്തിയിരിക്കുന്നത്.