എൻ്റെ വീട്ടുകാരേയും സുഹൃത്തുക്കളേയും വരെ അയാൾ വിളിച്ച് ശല്ല്യപ്പെടുത്തിയിരുന്നു; വെളിപ്പെടുത്തി നിത്യ മേനോൻ

ആറാട്ട് എന്ന മോഹൻലാൽ ചിത്രം റിലീസ് ചെയ്തപ്പോൾ അതിനു നൽകിയ പ്രതികരണത്തിന്റെ പേരിൽ സോഷ്യൽ മീഡിയയിൽ വൈറലായി മാറിയ ഒരു സിനിമാ പ്രേമി ഇപ്പോൾ പ്രേക്ഷകർക്ക് സുപരിചിതനാണ്. അതിനു ശേഷവും പല ചിത്രങ്ങൾക്കും ഇയാൾ നൽകിയ പ്രതികരണം സോഷ്യൽ മീഡിയയിൽ വൈറലാവുകയും, ഇദ്ദേഹവും വലിയ രീതിയിൽ ട്രോൾ ചെയ്യപ്പെടുകയും ചെയ്തു. അതിനിടയിലാണ് നടി നിത്യ മേനോനെ തനിക്കിഷ്ടമാണെന്നും, നിത്യയെ വിവാഹമാലോചിച്ചു വീട്ടിൽ വരെ പോയിട്ടുണ്ടെന്നും ഇയാൾ വെളിപ്പെടുത്തുന്നത്. അവസാനം നിത്യയുടെ വീട്ടുകാർ തനിക്കെതിരെ കേസ് കൊടുത്തെന്നും ഇയാൾ പറയുന്നു. ഇപ്പോൾ ആ വിഷയത്തിൽ ശരിക്കും നടന്നത് എന്താണെന്നു വെളിപ്പെടുത്തുകയാണ് നിത്യ മേനോൻ. ബിഹൈൻഡ് വുഡ്‌സ് ഐസിനു നൽകിയ അഭിമുഖത്തിലാണ് ഈ വിഷയത്തിൽ നടന്ന സംഭവങ്ങൾ നിത്യ വിശദീകരിച്ചത്.

ഇത് നടന്നത് അഞ്ചാറ് വർഷങ്ങൾക്കു മുന്പാണെന്നും, കുറെ നാൾ ഇയാളെ കൊണ്ടുള്ള ശല്യം സഹിക്കാൻ പറ്റില്ലായിരുന്നുവെന്നും നിത്യ മേനോൻ പറയുന്നു. അതിനു ശേഷം അടുത്തിടെ ഇയാൾ ഇതേ കാര്യം വെളിപ്പെടുത്തി സോഷ്യൽ മീഡിയയിൽ നിറഞ്ഞപ്പോൾ ഷോക്കായി പോയെന്നും നിത്യ പറഞ്ഞു. ഫോൺ നമ്പർ തപ്പി പിടിച്ചു തന്റെ അമ്മയേയും അച്ഛനെയും വരെ അയാൾ ഫോൺ ചെയ്തിട്ടുണ്ടെന്നും അവരോട് മോശമായി സംസാരിച്ചിട്ടുണ്ടെന്നും നിത്യ പറയുന്നു. സഹിക്കാൻ കഴിയുന്നതിനും അപ്പുറമായിരുന്നു പലപ്പോഴും അയാളുടെ പെരുമാറ്റമെന്നും പോലീസ് കേസ് കൊടുക്കാൻ ആ സമയത്തു പലരും നിർബന്ധിച്ചിരുന്നെന്നും നിത്യ ഓർത്തെടുക്കുന്നു. അയാളുടെ ഇരുപതു മുപ്പതു നമ്പറുകൾ ബ്ലോക്ക് ചെയ്യേണ്ടി വന്നിട്ടുണ്ടെന്നും, അയാൾക്ക്‌ എന്തോ പ്രശ്നം ഉണ്ടെന്നു മനസ്സിലായത് കൊണ്ടാണ് കൂടുതൽ നിയമ വഴികളിലേക്ക് പോകാതെ കണ്ടില്ലെന്നു നടിച്ചതെന്നും നിത്യ കൂട്ടിച്ചേർത്തു.