തുന്നി ചേർത്ത സ്വപ്നങ്ങളുമായി ബഷീറും ആമിറയും വരുന്നു; ഡിയർ വാപ്പി പുത്തൻ പോസ്റ്റർ കാണാം

ക്രൗൺ ഫിലിംസിന്റെ ബാനറിൽ ഷാൻ തുളസീധരൻ രചനയും സംവിധാനവും നിർവഹിക്കുന്ന പുതിയ ചിത്രമാണ് ഡിയർ വാപ്പി. കഴിഞ്ഞ മാസം ഷൂട്ടിംഗ് ആരംഭിച്ച ഈ ചിത്രത്തിന്റെ ടൈറ്റിൽ പോസ്റ്റർ, അതിനു ശേഷം വന്ന പോസ്ററുകൾ എന്നിവ ശ്രദ്ധ നേടിയിരുന്നു. ഇപ്പോഴിതാ ഈ ചിത്രത്തിന്റെ പുതിയ ഒരു പോസ്റ്റർ കൂടി റിലീസ് ചെയ്തിരിക്കുകയാണ്. മലയാളി പ്രേക്ഷകരുടെ പ്രീയപ്പെട്ട നടനും സംവിധായകനുമായ ലാൽ കേന്ദ്ര കഥാപാത്രത്തെ അവതരിപ്പിക്കുന്ന ഈ ചിത്രത്തിൽ, തിങ്കളാഴ്ച നിശ്ചയം ഫെയിം അനഘ നാരായണനും കേന്ദ്ര കഥാപാത്രമായി എത്തുന്നു. ഇവരെ കൂടാതെ നിരഞ്ജ് മണിയൻപിള്ള രാജു വെയിൽ എന്ന ചിത്രത്തിലൂടെ ശ്രദ്ധ നേടിയ ശ്രീരേഖ, ശശി എരഞ്ഞിക്കൽ, മണിയന്‍പിള്ള രാജു, ജഗദീഷ്, അപ്പുണ്ണി ശശി, നിര്‍മല്‍ പാലാഴി, ഉണ്ണി രാജ, സുനില്‍ സുഖദ, ചെമ്പില്‍ അശോകന്‍, സാവിത്രി ശ്രീധരന്‍, ബാലന്‍ പാറക്കല്‍, നീന കുറുപ്പ്, അഭിറാം, രഞ്ജിത്ത് ശേഖര്‍, രാകേഷ് മുരളി, ജയകൃഷ്ണന്‍ എന്നിവരും ഈ ചിത്രത്തിന്റെ താരനിരയുടെ ഭാഗമാണ്.

ഒരുപാട് സ്വപ്നങ്ങളുമായി ജീവിക്കുന്ന തയ്യൽക്കാരനായ ബഷീറിന്റെയും മോഡലായ മകൾ ആമിറയുടെയും ജീവിത കഥയാണ് ഡിയർ വാപ്പി നമ്മുടെ മുന്നിലെത്തിക്കുക. സംഗീതത്തിന് പ്രാധാന്യമുള്ള ഈ ചിത്രത്തിൽ വ്യത്യസ്ത ശൈലിയിലുള്ള ഗാനങ്ങളാണുണ്ടാവുക. കൈലാസ് മേനോൻ സംഗീത സംവിധാനം നിർവഹിക്കുന്ന ഈ ചിത്രത്തിൽ അഞ്ച് ഗാനങ്ങൾ ഉണ്ടാകുമെന്നാണ് റിപ്പോർട്ടുകൾ പറയുന്നത്. ഈ ചിത്രത്തിന്റെ കഥ നടക്കുന്നത് മലബാറിലാണെന്നത് കൊണ്ട് ഇതിലൊരു മലബാർ സ്റ്റൈൽ ഗാനവും, ഒരു സൂഫി സ്റ്റൈൽ ഗാനവുമുണ്ടെന്നും കൈലാസ് മേനോൻ പറഞ്ഞിരുന്നു. ആൽമരം എന്ന പ്രശസ്ത ബാൻഡുമായി കൈകോർത്തും ഒരു ഗാനം ഇതിൽ ഒരുക്കുന്നുണ്ട്. ഈ ചിത്രത്തിന് ക്യാമറ ചലിപ്പിക്കുന്നത് പാണ്ടി കുമാർ, എഡിറ്റ് ചെയ്യാൻ പോകുന്നത് ലിജോ പോൾ എന്നിവരാണ്.