കസബയുടെ രണ്ടാം ഭാഗം ആവശ്യപ്പെട്ടു സോഷ്യൽ മീഡിയ..

കസബയുടെ രണ്ടാം ഭാഗം ആവശ്യപ്പെട്ടു സോഷ്യൽ മീഡിയ; പ്രതികരണം പാർവതിയുടെ വിമർശനത്തിന് എതിരെ..!

കഴിഞ്ഞ വർഷം മലയാളത്തിൽ റിലീസ് ചെയ്ത മമ്മൂട്ടി ചിത്രമായിരുന്നു കസബ. മമ്മൂട്ടി രാജൻ സക്കറിയ എന്ന ഒരു പോലീസ് ഓഫീസറുടെ കഥാപാത്രത്തെയാണ് ഈ ചിത്രത്തിൽ അവതരിപ്പിച്ചത്. രഞ്ജി പണിക്കരുടെ മകൻ നിതിൻ രഞ്ജി പണിക്കർ സംവിധാനം ചെയ്ത ഈ ചിത്രം ബോക്സ് ഓഫീസിൽ മികച്ച വിജയവും നേടിയ ചിത്രമാണ്. എന്നാൽ ഇപ്പോൾ ചിത്രം ഇറങ്ങി ഒന്നര വർഷത്തിന് ശേഷം നടി പാർവതി ഈ ചിത്രത്തിന് മേൽ വിമർശനം ചൊരിഞ്ഞു കൊണ്ട് രംഗത്ത് വന്നതോടെ കസബ വീണ്ടും ചർച്ചകളിൽ നിറയുകയാണ്.

മമ്മൂട്ടി എന്ന മഹാനടൻ ഇത്തരം നായകന്മാരെ വെള്ളിത്തിരയിൽ അവതരിപ്പിച്ചു സ്ത്രീകളോട് അപകീർത്തികരമായ ഡയലോഗുകൾ പറയുന്നത് സങ്കടകരമാണെന്നും തന്നെ വളരെ നിരാശപ്പെടുത്തിയ ഒരു മോശം ചിത്രമാണ് കസബ എന്നുമായിരുന്നു പാർവതി പറഞ്ഞത്.ഐ എഫ് എഫ് കെ യുടെ ഓപ്പൺ ഫോറത്തിൽ വെച്ചാണ് പാർവതി ഇത് പറഞ്ഞത്. വെള്ളിത്തിരയിൽ ഇത്തരം നായകന്മാരെയല്ല നമ്മുക്ക് വേണ്ടത് എന്നും പാർവതി പറഞ്ഞു.

അതിനെതിരെ ഇപ്പോൾ പ്രതികരണവുമായി മമ്മൂട്ടി ആരാധകർ രംഗത്ത് വന്നിരിക്കുകയാണ്. കസബ എന്ന ചിത്രത്തിന്റെ രണ്ടാം ഭാഗം ആവശ്യപ്പെട്ടു കൊണ്ടാണ് അവർ പാർവതിക്കെതിരെ പ്രതികരിക്കുന്നത്.

ആരാധകരെ കൂടാതെ, കഴിഞ്ഞ ദിവസം പ്രശസ്ത രചയിതാവും സംവിധായകനുമായ വ്യാസൻ എടവനക്കാടും പാർവതിക്കെതിരെയും പാർവതി പ്രതിനിധീകരിക്കുന്ന സ്ത്രീ സംഘടനക്കെതിരെയും രംഗത്ത് വന്നിരുന്നു. ഏതായാലും ആരാധകരുടെ ആവശ്യപ്രകാരം കസബക്കു ഒരു രണ്ടാം ഭാഗം വരുമോ എന്നും മമ്മൂട്ടി അതിൽ അഭിനയിക്കുമോ എന്നും കാത്തിരുന്ന് കാണാം.