മലയാളത്തിന്റെ യുവ താരം നീരജ് മാധവ് ഇനി ബോളിവുഡിലും

വളരെ ചുരുങ്ങിയ കാലം കൊണ്ട് തന്നെ മലയാളി സിനിമാ പ്രേക്ഷകർക്കിടയിൽ പ്രിയങ്കരനായി മാറിയ യുവനടനാണ് നീരജ് മാധവ്. നടനായി മാത്രമല്ല, മികച്ച നർത്തകനായും തിരക്കഥാകൃത്തയുമെല്ലാം നീരജ് മാധവ് തന്റെ പ്രതിഭ ഇവിടെ തെളിയിച്ചു കഴിഞ്ഞു. ഇപ്പോൾ വരുന്ന വാർത്ത ശെരിയാണെങ്കിൽ, നീരജ് മാധവ് ബോളിവുഡിൽ അരങ്ങേറ്റം കുറിക്കാനുള്ള തയ്യാറെടുപ്പിലാണ്. മോഹൻലാലിനും മമ്മൂട്ടിക്കും പൃഥ്‌വി രാജിനും ദുൽകർ സൽമാനും ശേഷം മലയാളത്തിലെ ഒരു പ്രശസ്ത നടൻ കൂടി ബോളിവുഡിൽ തന്റെ പ്രതിഭ തെളിയിക്കാൻ ഒരുങ്ങുകയാണ് എന്നാണ് റിപ്പോർട്ടുകൾ പറയുന്നത്. രാജ്- കൃഷ്ണ എന്ന ബോളിവുഡ് സംവിധായകർ ഒന്നിക്കാൻ പോകുന്ന ഒരു വെബ് സീരിസിൽ ആണ് നീരജ് മാധവ് അഭിനയിക്കാൻ പോകുന്നത് എന്നാണ് സൂചന.

ഹോളിവുഡിൽ വളരെ പോപ്പുലർ ആണ് വെബ് സീരീസുകൾ. അതുപോലെ തന്നെ ഇന്ത്യയിലും ഇപ്പോൾ വെബ് സീരീസുകൾ പോപ്പുലർ ആവുകയാണ്. പ്രശസ്ത നടൻ മാധവൻ അഭിനയിച്ച വെബ് സീരിസ് കുറച്ചു നാൾ മുൻപേ വന്നിരുന്നു. അതുപോലെ തന്നെ റസൂൽ പൂക്കുട്ടി സംവിധാനം ചെയ്യാൻ പോകുന്ന വെബ് സീരിസിൽ മോഹൻലാൽ ആണ് നായകൻ എന്നും വാർത്തകൾ വന്നിരുന്നു. നീരജ് മാധവ് അഭിനയിക്കാൻ പോകുന്ന ഈ പുതിയ വെബ് സീരിസിൽ ബോളിവുഡ് താരങ്ങളായ തബു, മനോജ് ബാജ്പയീ എന്നിവരും അഭിനയിക്കുന്നുണ്ട് എന്നാണ് റിപ്പോർട്ടുകൾ പറയുന്നത്.

ആമസോൺ പ്രൈമിലൂടെ റിലീസ് ചെയ്യാൻ പോകുന്ന ഈ വെബ് സീരിസ് ത്രില്ലർ സ്വഭാവത്തിലാണ് ഒരുക്കാൻ പോകുന്നത്. സൈഫ് അലി ഖാൻ, നവാസുദ്ധീന് സിദ്ദിഖി എന്നീ ബോളിവുഡ് താരങ്ങളും ഇപ്പോൾ വെബ് സീരീസുകളുടെ ഭാഗം ആണ്. മലയാളത്തിൽ നിന്ന് വെബ് സീരിസിൽ അഭിനയിക്കാൻ പോകുന്ന ആദ്യത്തെ നടൻ ആയി മാറുകയാണ് ഇപ്പോൾ നീരജ് മാധവ്. മമ്മൂട്ടിയോടൊപ്പം അഭിനയിച്ച മാമാങ്കം എന്ന വലിയ ചിത്രമാണ് നീരജ് മാധവ് പൂർത്തിയാക്കിയ മലയാളം പ്രൊജക്റ്റ്.