കേരളാ ബോക്സ് ഓഫീസിൽ അജയൻ vs അജയൻ പോരാട്ടം; കുതിച്ചു കയറി അജയന്റെ രണ്ടാം മോഷണവും കിഷ്കിന്ധാ കാണ്ഡവും

ഇത്തവണ ഓണത്തിന് കേരളാ ബോക്സ് ഓഫീസിൽ യുവതാര യുദ്ധമാണ് കാണാൻ സാധിക്കുന്നത്. ടോവിനോ തോമസ് നായകനായ അജയന്റെ രണ്ടാം മോഷണം, ആസിഫ് അലി നായകനായ കിഷ്കിന്ധാ കാണ്ഡം എന്നിവയാണ് ആ ചിത്രങ്ങൾ. രണ്ട് ചിത്രങ്ങളും റിലീസ് ചെയ്ത ആദ്യ ദിനം മുതൽ തന്നെ മികച്ച പ്രേക്ഷക- നിരൂപക പ്രതികരണങ്ങൾ നേടി വമ്പൻ കുതിപ്പാണ് നടത്തുന്നത്.

അജയൻ, മണിയൻ, കുഞ്ഞിക്കേളു എന്നീ മൂന്നു കഥാപാത്രങ്ങളാണ് അജയന്റെ രണ്ടാം മോഷണത്തിൽ ടോവിനോ ചെയ്തതെങ്കിൽ, അജയചന്ദ്രൻ എന്ന ഫോറെസ്റ്റ് ഓഫിസറുടെ വേഷമാണ് കിഷ്കിന്ധാ കാണ്ഡത്തിൽ ആസിഫ് അലി ചെയ്തിരിക്കുന്നത്. ചുരുക്കി പറഞ്ഞാൽ ഇപ്പോൾ സൂപ്പർ വിജയം നേടി മുന്നേറുന്ന രണ്ടു ചിത്രങ്ങളിലേയും നായക കഥാപാത്രങ്ങളുടെ പേര് അജയൻ എന്നായത് പ്രേക്ഷകരിലും കൗതുകം ജനിപ്പിക്കുന്നുണ്ട്.

നവാഗതനായ ജിതിൻ ലാൽ ഒരുക്കിയ അജയന്റെ രണ്ടാം മോഷണം ബോക്സ് ഓഫീസിൽ ഏഴ് ദിവസം കൊണ്ട് 50 കോടി ഗ്രോസ് കളക്ഷൻ നേടിക്കഴിഞ്ഞു. കേരളത്തിൽ നിന്ന് മാത്രം 20 കോടിക്ക് മുകളിലാണ് ഈ ചിത്രം നേടിയത്. ദിൻജിത് അയ്യത്താൻ സംവിധാനം ചെയ്ത കിഷ്കിന്ധാ കാണ്ഡം, പതിഞ്ഞ തുടക്കത്തിന് ശേഷം ഇപ്പോൾ ബോക്സ് ഓഫീസിൽ കത്തി പടരുകയാണ്. ആഗോള ഗ്രോസ് 20 കോടിയിലേക്ക് എത്തുന്ന ഈ ചിത്രം ആസിഫ് അലിയുടെ കരിയറിലെ ഏറ്റവും വലിയ ഹിറ്റായി മാറാനുള്ള കുതിപ്പിലാണ്.

സുജിത് നമ്പ്യാർ രചിച്ച അജയന്റെ രണ്ടാം മോഷണത്തിൽ ഹാരിഷ് ഉത്തമൻ, കൃതി ഷെട്ടി, ബേസിൽ ജോസഫ്, സുരഭി ലക്ഷ്മി, രോഹിണി എന്നിവരും വേഷമിട്ടിരിക്കുന്നു. വിജയരാഘവൻ, അപർണ്ണ ബാലമുരളി, ജഗദീഷ്, അശോകൻ എന്നിവരാണ് ബാഹുൽ രമേശ് രചിച്ച കിഷ്കിന്ധാ കാണ്ഡത്തിലെ മറ്റു പ്രധാന താരങ്ങൾ.