മോഹൻലാൽ- നസീറുദ്ധീൻ ഷാ ഒന്നിക്കുന്നു, ഒപ്പം ശോഭനയും; വമ്പൻ ചിത്രത്തിന്റെ പ്രഖ്യാപനം ഉടൻ?

മലയാളത്തിന്റെ മഹാനടൻ മോഹൻലാൽ തന്റെ കരിയറിലെ ഒരു പുത്തൻ ട്രാക്കിലേക്ക് കയറുന്ന കാഴ്ചയാണ് കാണാൻ സാധിക്കുന്നത്. വലിയ പ്രതീക്ഷ പകരുന്ന ഒരുപിടി ചിത്രങ്ങളിലേക്കുള്ള അദ്ദേഹത്തിന്റെ യാത്രയാണ് ഈ പുതിയ വർഷം നമ്മുക്ക് കാണിച്ചു തരുന്നത്. ഈ വർഷത്തെ താൻ അഭിനയിക്കുന്ന ആദ്യത്തെ മലയാള ചിത്രത്തിൽ അദ്ദേഹം നാളെ ജോയിൻ ചെയ്യും. ലിജോ ജോസ് പെല്ലിശേരി ഒരുക്കുന്ന മലൈക്കോട്ടൈ വാലിബൻ എന്ന എന്ന ചിത്രമാണത്. ഇത് കൂടാതെ ജീത്തു ജോസഫ് ഒരുക്കുന്ന റാം, പൃഥ്വിരാജ് സുകുമാരൻ ഒരുക്കുന്ന എംപുരാൻ, പുതിയ തലമുറയിലെ സംവിധായകനായ വിവേക് എന്നിവർ ഒരുക്കുന്ന ചിത്രവും മോഹൻലാൽ ഈ വർഷം ചെയ്യുന്ന ചിത്രങ്ങളാണ്. ഇപ്പോഴിതാ ഏറ്റവും പുതിയ വാർത്തകൾ പ്രകാരം ഈ വർഷം മോഹൻലാൽ ചെയ്യാൻ പോകുന്ന ചിത്രങ്ങളുടെ പട്ടികയിലേക്ക് ഒരു ചിത്രം കൂടി വന്നിരിക്കുകയാണ്.

വരനെ ആവശ്യമുണ്ട് എന്ന സൂപ്പർ ഹിറ്റ് ചിത്രത്തിലൂടെ അരങ്ങേറ്റം കുറിച്ച അനൂപ് സത്യൻ ചിത്രമാണത്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കാൻ പോകുന്ന അനൂപ് സത്യൻ ചിത്രത്തിൽ മോഹൻലാലിനൊപ്പം വമ്പൻ താരനിരയാണ് അണിനിരക്കുക. ബോളിവുഡ് താരം നസിറുദ്ധീൻ ഷായും മോഹൻലാലിനൊപ്പം എത്തുന്ന ഈ ചിത്രത്തിലൂടെ, മലയാളത്തിലെ എവർഗ്രീൻ ജോഡിയായ മോഹൻലാൽ- ശോഭന ടീം വീണ്ടും ഒന്നിക്കുന്നു എന്നും സൂചനയുണ്ട്. ഇവരെ കൂടാതെ മുകേഷ്, ഷെയിൻ നിഗം എന്നിവരും ഈ ചിത്രത്തിന്റെ ഭാഗമായി എത്തിയേക്കാമെന്നും സ്ഥിരീകരിക്കാത്ത റിപ്പോർട്ടുകൾ പറയുന്നു. ലിജോ ജോസ് പെല്ലിശേരി, ജീത്തു ജോസഫ്, പൃഥ്വിരാജ് ചിത്രത്തിന്റെ ആദ്യ ഷെഡ്യൂൾ എന്നിവ തീർത്തതിന് ശേഷം മോഹൻലാൽ ചെയ്യാൻ പോകുന്ന ചിത്രമായിരിക്കും ഇതെന്നാണ് സൂചന.