ഹാട്രിക്ക് വിജയത്തിനായി നാദിർഷാ…!!

ബ്ലോക്ബസ്റ്റർ വിജയങ്ങൾ ആയി മാറിയ അമർ അക്ബർ അന്തോണിക്കും കട്ടപ്പനയിലെ ഋത്വിക് റോഷനും ശേഷം ഹിറ്റ് മേക്കർ നാദിർഷ ഒരുക്കിയ പുതിയ ചിത്രത്തിന്റെ പേരാണ് മേരാ നാം ഷാജി. ചിത്രത്തിന്റെ പേര് സൂചിപ്പിക്കുന്നത് പോലെ മൂന്നു ഷാജിമാരുടെ കഥയാണ് ഈ ചിത്രം പറയുന്നത്. ആ മൂന്നു ഷാജിമാർ ആയി എത്തുന്നത് ബിജു മേനോൻ, ആസിഫ്  അലി, ബൈജു എന്നിവരാണ്. കോഴിക്കോട് ഉള്ള ഷാജി ആയി ബിജു മേനോൻ എത്തുമ്പോൾ തിരുവനന്തപുരത്തു ഉള്ള ഷാജി ആയി എത്തുന്നത് ബൈജു ആണ്. ആസിഫ് അലി എത്തുന്നത് കൊച്ചിയിൽ ഉള്ള ഷാജി ആയാണ്. ഇതിന്റെ ആദ്യ ടീസർ കുറച്ചു ദിവസങ്ങൾക്കു മുൻപേ റീലീസ് ചെയ്തിരുന്നു. മികച്ച പ്രേക്ഷക പ്രതികരണം ആണ് ആ ടീസർ നേടിയെടുത്തത്.

ഇപ്പോഴിതാ ഈ ചിത്രത്തിലെ ആദ്യ ഗാനവും സോഷ്യൽ മീഡിയയിൽ തരംഗമായി കഴിഞ്ഞിരിക്കുന്നു. മനസ്സുക്കുള്ളെ എന്നു തുടങ്ങുന്ന ഈ ഗാനം പാടിയിരിക്കുന്നത് ശ്രേയ ഘോഷാലും രഞ്ജിത്തും ചേർന്നാണ്. എമിൽ മുഹമ്മദ് സംഗീതം നൽകിയിരിക്കുന്ന ഈ ഗാനം വളരെ മനോഹരമായാണ് നാദിർഷാ ചിത്രീകരിച്ചിരിക്കുന്നത്. വിനോദ് ഇല്ലംപിള്ളി ദൃശ്യങ്ങൾ ഒരുക്കിയിരിക്കുന്ന ഈ ഗാനത്തിൽ ആസിഫ് അലിയും നിഖില വിമലുമാണ് അഭിനയിച്ചിരിക്കുന്നത്. നാദിർഷയും ഈ ചിത്രത്തിന് വേണ്ടി സംഗീത സംവിധാനം ചെയ്തിട്ടുണ്ട്. ദിലീപ് പൊന്നൻ ആണ് ഈ ചിത്രത്തിന്റെ തിരക്കഥ രചിച്ചിരിക്കുന്നത്. ബിജു മേനോൻ, ആസിഫ് അലി, ബൈജു, നിഖില വിമൽ എന്നിവർക്ക് ഒപ്പം ശ്രീനിവാസനും ഈ ചിത്രത്തിൽ അഭിനയിച്ചിട്ടുണ്ട്. ബി രാകേഷ് ആണ് മേരാ നാം ഷാജി നിർമ്മിച്ചിരിക്കുന്നത്. ചിത്രം ഉടൻ തന്നെ റീലീസ് ചെയ്യും.