ഒരുങ്ങുന്നത് വമ്പൻ ആക്ഷൻ ചിത്രം; ദളപതി ചിത്രത്തെ കുറിച്ച് കൂടുതൽ വെളിപ്പെടുത്തി ലോകേഷ് കനകരാജ്

തമിഴകത്തിന്റെ സൂപ്പർ ഹിറ്റ് സംവിധായകനായ ലോകേഷ് കനകരാജ് തന്റെ ഏറ്റവും പുതിയ ചിത്രത്തിന്റെ പ്രീ പ്രൊഡക്ഷൻ ജോലികളിലാണ്. വിക്രം എന്ന ഇൻഡസ്ട്രി ഹിറ്റ് കമൽ ഹാസൻ ചിത്രത്തിന് ശേഷം ലോകേഷ് ചെയ്യാൻ പോകുന്ന ചിത്രത്തിന് മേലുള്ള പ്രേക്ഷക പ്രതീക്ഷകൾ വളരെ കൂടുതലാണ്. മാസ്റ്റർ എന്ന ബ്ലോക്ക്ബസ്റ്റർ ചിത്രത്തിന് ശേഷം ദളപതി വിജയ്‌ക്കൊപ്പം ലോകേഷ് വീണ്ടുമൊന്നിക്കുന്ന ചിത്രമാണിതെന്നാണ് വാർത്തകൾ പറയുന്നത്. തൃഷ ഇതിൽ നായികാ വേഷം ചെയ്യുമെന്നും വാർത്തകൾ വന്നിരുന്നു. ഏതായാലും അടുത്ത മാസം ഇതിന്റെ ഒഫീഷ്യൽ പ്രഖ്യാപനം ഉണ്ടാവുമെന്നാണ് തമിഴ് മാധ്യമങ്ങൾ നൽകുന്ന സൂചന. ഇപ്പോഴിതാ തന്റെ പുതിയ ചിത്രത്തെ കുറിച്ച് കൂടുതൽ വെളിപ്പെടുത്തുകയാണ് ലോകേഷ് കനകരാജ്. ഒരു തമിഴ് മാധ്യമത്തിന് നൽകിയ അഭിമുഖത്തിലാണ് അദ്ദേഹം പുതിയ സിനിമ എത്തരത്തിലുള്ളതാവുമെന്നു തുറന്നു പറഞ്ഞത്.

ഒരു പക്കാ ആക്ഷൻ ചിത്രമാണ് താനൊരുക്കാൻ പോകുന്നതെന്നും, അതിതീവ്രമായ ആക്ഷൻ സീനുകൾ നിറഞ്ഞ ഒരു ചിത്രമൊരുക്കാനാണ് പ്ലാനെന്നും അദ്ദേഹം പറയുന്നു. വിക്രം, മാസ്റ്റർ, കൈതി എന്നീ ചിത്രങ്ങൾ ലോകേഷിനൊപ്പം ചേർന്ന് രചിച്ച രത്‌നകുമാർ തന്നെയാണ് ഈ ചിത്രത്തിലും അദ്ദേഹത്തിന്റെ രചന പങ്കാളിയെന്നാണ് റിപ്പോർട്ടുകൾ പറയുന്നത്. തെന്നിന്ത്യയിലെ വിവിധ ഇന്ഡസ്ട്രികളിൽ നിന്നുള്ള വലിയ താരങ്ങൾ ഈ ചിത്രത്തിന്റെ ഭാഗമായേക്കാമെന്നും റിപ്പോർട്ടുകളുണ്ട്. ബോളിവുഡിൽ നിന്നും താരങ്ങൾ ഇതിന്റെ ഭാഗമാവുമെന്ന് സ്ഥിതീകരിക്കാത്ത വാർത്തകൾ വന്നിരുന്നു. ലോകേഷ് കനകരാജ്- വിജയ് ചിത്രമായ മാസ്റ്റർ നിർമ്മിച്ച അതേ ടീം തന്നെയാവും ഈ പുത്തൻ ചിത്രവും നിർമ്മിക്കുകയെന്നാണ് സൂചന. ഏതായാലും ഈ ചിത്രത്തിന്റെ ഒഫീഷ്യൽ പ്രഖ്യാപനത്തിനായി കാത്തിരിക്കുകയാണ് സിനിമാ പ്രേമികളും ആരാധകരും.