പൃഥ്വിരാജ് – ദുൽഖർ ടീമിന്റെ ആഡംബര കാറോട്ട മത്സരം; പോലീസ് അന്വേഷണം തുടങ്ങി..!

രണ്ടു ദിവസം മുൻപാണ് മലയാളത്തിലെ യുവ താരങ്ങളായ പൃഥ്വിരാജ് സുകുമാരൻ, ദുൽഖർ സൽമാൻ എന്നിവർ തങ്ങളുടെ ആഡംബര കാറുകളിൽ സംസ്ഥാനത്തെ റോഡിലൂടെ ചീറി പാഞ്ഞത്. ആഡംബര കാറുകളിൽ ഇരുവരും നടത്തിയ മത്സര ഓട്ടത്തിന്റെ വീഡിയോ വൈറലായതോടെ ഇരുവരും ട്രാഫിക് നിയമങ്ങൾ കാറ്റിൽ പറത്തിയാണ് കാറോടിച്ചതു എന്ന ആരോപണങ്ങളും സോഷ്യൽ മീഡിയയിൽ നിറഞ്ഞു. തന്റെ ലംബോർഗിനിയിൽ പൃഥ്വിരാജ് സുകുമാരനും പോർഷെയിൽ ദുൽഖർ സൽമാനും കോട്ടയം- ഏറ്റുമാനൂർ- കൊച്ചി റൂട്ടിലാണ് അതിവേഗത്തിൽ പറന്നത്. അവർ ചീറി പായുന്ന വീഡിയോ അവരുടെ പിന്നാലെ ബൈക്കിൽ പോയ രണ്ടു യുവാക്കൾ പകർത്തി സോഷ്യൽ മീഡിയയിൽ ഇടുകയായിരുന്നു. പൃഥ്വിരാജ്, ദുൽഖർ എന്നിവർക്കൊപ്പം അവരുടെ രണ്ടു സുഹൃത്തുക്കളും മറ്റു രണ്ടു ആഡംബര കാറുകളിൽ ഒപ്പമുണ്ടായിരുന്നു. ഏതായാലും ഈ വീഡിയോ വൈറലായതോടെ സംസ്ഥാന മോട്ടോർ വാഹന വകുപ്പ് അന്വേഷണം ആരംഭിച്ചു കഴിഞ്ഞു.

വിഷയത്തില്‍ അന്വേഷണം നടത്തുന്ന കാര്യം എറണാകുളം ആര്‍ടിഒ ഷാജി സ്ഥിതീകരിച്ചിട്ടുണ്ട്. എംസി റോഡില്‍ ഇവരുടെ കാറുകള്‍ അമിതവേഗതയില്‍ പാഞ്ഞെന്നാണ് പറഞ്ഞുകേട്ടത് എന്നും എന്നാൽ അതിന്റെ അടിസ്ഥാനത്തിൽ ഈ റോഡിലെ ക്യാമറകള്‍ പരിശോധിച്ചെങ്കിലും പ്രസ്തുത വാഹനങ്ങള്‍ കടന്നുപോകുന്നതായി കണ്ടില്ല എന്നാണ് അദ്ദേഹം പറയുന്നത്. മറ്റ് സ്ഥലങ്ങളിലെ ദൃശ്യങ്ങളും പരിശോധിക്കുന്നുണ്ട് എന്നും എന്നാൽ ഈ കാര്യത്തിൽ ഒരു പരാതി ഇത് വരെ തങ്ങൾക്കു ലഭിച്ചിട്ടില്ല എന്നും അദ്ദേഹം വെളിപ്പെടുത്തി. വൈറലായ വീഡിയോയില്‍ ക്ലാരിറ്റിക്കുറവുള്ളത് കൊണ്ട് ആ വീഡിയോ വെച്ച് അമിത വേഗമാണെന്ന് സ്ഥിരീകരിക്കാനോ കേസെടുക്കാനോ പറ്റില്ലെന്നും അദ്ദേഹം വ്യക്തമാക്കി. വാഹനങ്ങള്‍ പോയ റോഡ് ഏതാണെന്ന് ഇതുവരെ വ്യക്തമായിട്ടില്ലെന്നും അദ്ദേഹം ദി ക്യൂ ചാനലിനോട് പ്രതികരിച്ചു.