മഹാനടിക്ക് ആദരാഞ്ജലികൾ അർപ്പിച്ചു മലയാള സിനിമാ ലോകം..!

കഴിഞ്ഞ ദിവസം രാത്രിയാണ് മലയാളത്തിലെ നടന വിസ്‌മയങ്ങളിൽ ഒരാളായിരുന്ന പ്രശസ്ത അഭിനേത്രി കെ പി എ സി ലളിത ചേച്ചി അന്തരിച്ചത്. 74 വയസ്സായിരുന്നു. വാർധക്യ സഹജമായ അസുഖങ്ങൾ മൂലം കിടപ്പിലായിരുന്നു ലളിത ചേച്ചി. തൃപ്പൂണിത്തുറയിലുള്ള മകൻ്റെ ഫ്ലാറ്റിൽ വെച്ചായിരുന്നു അന്ത്യം. ഭൗതീകശരീരം ഇന്ന് രാവിലെ 11വരെ തൃപ്പൂണിത്തുറ ലായം ഓഡിറ്റോറിയത്തില്‍ പൊതുദർശനത്തിന് വെച്ചതിനു ശേഷം, വടക്കാഞ്ചേരിയിലാകും ഔദ്യോഗിക ബഹുമതികളോടെ സംസ്കാര ചടങ്ങുകൾ നടക്കുക. നാടകത്തിലൂടെ സിനിമാ രംഗത്തേക്ക് എത്തി, മലയാളത്തിലും തമിഴിലുമായി അഞ്ഞൂറിലേറെ സിനിമകളിൽ അഭിനയിച്ചു, മികച്ച സഹനടിക്കുള്ള ദേശീയ ചലച്ചിത്ര പുരസ്കാരം രണ്ടുവട്ടം സ്വന്തമാക്കിയ ലളിത ചേച്ചി നാല് പ്രാവശ്യം സംസ്ഥാന ചലച്ചിത്ര പുരസ്കാരത്തിന് കൂടി അർഹയായി. ഇപ്പോഴിതാ ചേച്ചിക്ക് ആദരാഞ്ജലികൾ അർപ്പിച്ചു കൊണ്ട് എത്തുകയാണ് മലയാള സിനിമാ ലോകം. ഇന്നലെ രാത്രി ആദ്യം തന്നെ മലയാളത്തിന്റെ മഹാനടൻ മോഹൻലാൽ ചേച്ചിയെ അവസാനമായി കാണാൻ എത്തിയിരുന്നു. ഇന്ന് രാവിലെ മമ്മൂട്ടിയും ചേച്ചിയുടെ ഭൗതിക ശരീരം കാണാൻ എത്തി.

ഇവരെ കൂടാതെ ദിലീപ്, ഫഹദ് ഫാസിൽ, ബാബുരാജ്, ജയറാം, സത്യൻ അന്തിക്കാട്, ബി ഉണ്ണികൃഷ്ണൻ, ജി സുരേഷ് കുമാർ, ജീത്തു ജോസഫ്, വിജയ് ബാബു, ഇന്നസെന്റ്, മുരളി ഗോപി, ടോവിനോ തോമസ്, ദുൽകർ സൽമാൻ, കുഞ്ചാക്കോ ബോബൻ, ആസിഫ് അലി, നിവിൻ പോളി, പൃഥ്വിരാജ് സുകുമാരൻ, വിനീത് ശ്രീനിവാസൻ, സുരേഷ് ഗോപി, ഗിന്നസ് പക്രു, മനോജ് കെ ജയൻ, ലാൽ, ഷമ്മി തിലകൻ, അനു സിതാര, ആന്റണി വർഗീസ്, ജോയ് മാത്യു, മഞ്ജു വാര്യർ, ഗീതു മോഹൻദാസ്, റിമ കല്ലിങ്കൽ, മീനാക്ഷി, എസ്തർ അനിൽ, അൻസിബ ഹസൻ, നവ്യ നായർ, സംയുക്ത വർമ്മ, ശ്രിന്ദ തുടങ്ങിയ ഒട്ടേറെ പേര് ലളിത ചേച്ചിക്ക് ആദരാഞ്ജലികൾ അർപ്പിച്ചു കൊണ്ട് നേരിട്ടും സോഷ്യൽ മീഡിയയിലൂടെയും മുന്നോട്ടു വന്നു. ചേച്ചിയുമൊത്തുള്ള ഓർമകളും പലരും ദൃശ്യ മാധ്യമങ്ങളിലൂടെ പങ്കു വെക്കുന്നു.