ദളപതി വിജയ്ക്കൊപ്പം വീണ്ടും ജയറാം; വെങ്കട് പ്രഭു ചിത്രത്തിൽ വമ്പൻ താരനിര.

ദളപതി വിജയ് നായകനായി എത്തുന്ന ഏറ്റവും പുതിയ ചിത്രത്തിന്റെ ഷൂട്ടിംഗ് ആരംഭിച്ചു. ദളപതി 68 എന്ന് താൽക്കാലികമായി പേര് നൽകിയിരിക്കുന്ന ഈ ചിത്രത്തിന്റെ സംവിധായകൻ വെങ്കട് പ്രഭുവാണ്. എ ജി എസ് എന്റർടൈൻമെന്റ് നിർമ്മിക്കുന്ന ഈ ചിത്രത്തിന്റെ താരനിരയും ഇപ്പോൾ സോഷ്യൽ മീഡിയയുടെ ശ്രദ്ധ നേടുന്നുണ്ട്. മീനാക്ഷി ചൗധരി നായികാ വേഷം ചെയ്യുന്ന ഈ ചിത്രത്തിൽ സ്നേഹ, ലൈല, പ്രഭുദേവ, പ്രശാന്ത്, മോഹൻ, വൈഭവ് എന്നിവരും വേഷമിടുന്നുണ്ടെന്ന് വാർത്തകൾ വന്നിരുന്നു. ഇപ്പോഴിതാ പ്രശസ്ത മലയാള താരം ജയറാമും ഇതിന്റെ താരനിരയിലുണ്ടെന്ന റിപ്പോർട്ടുകളാണ് വരുന്നത്. 2012 ഇൽ റിലീസ് ചെയ്ത എ ആർ മുരുഗദോസ് ചിത്രം തുപ്പാക്കിയിലാണ് ഇതിന് മുൻപ് വിജയ്- ജയറാം ടീം ഒന്നിച്ചത്. അതുപോലെ തന്നെ 2008 ഇൽ റിലീസ് ചെയ്ത സരോജ എന്ന ചിത്രത്തിലൂടെ വെങ്കട് പ്രഭുവിനൊപ്പവും ജയറാം ജോലി ചെയ്തിട്ടുണ്ട്.

ഏതായാലും ഇവർക്കെല്ലാമൊപ്പം വർഷങ്ങൾക്ക് ശേഷം ജയറാം ഒന്നിക്കുന്നത് തന്നെ ആരാധകരിൽ ആവേശം സൃഷ്ടിച്ചിട്ടുണ്ട്. മെഗാ ബഡ്ജറ്റിലൊരുക്കാൻ പോകുന്ന ഈ വിജയ് ചിത്രത്തിന് സംഗീതം പകരുന്നത് യുവാൻ ശങ്കർ രാജയാണ്. ചെന്നൈയിൽ നടക്കുന്ന ആദ്യ ഘട്ട ഷൂട്ടിങ്ങിനു ശേഷം ഇതിന്റെ ടീം ബാക്കി ഭാഗങ്ങൾ ചിത്രീകരിക്കാൻ വിദേശത്തേക്ക് പുറപ്പെടും. എ ഐ ടെക്‌നോളജി ഉപയോഗിച്ചുള്ള ഒരു ഗാനരംഗവും ഇതിൽ ഉൾപ്പെടുത്തുന്നുണ്ട്. വിജയ് ഇരട്ട വേഷത്തിലെത്തുമെന്ന് കരുതപ്പെടുന്ന ഈ ചിത്രം സയൻസ് ഫിക്ഷൻ അടിസ്ഥാനപ്പെടുത്തിയൊരുക്കുന്ന ഒരു മാസ്സ് എന്റെർറ്റൈനെർ ആയിരിക്കുമെന്നാണ് സൂചന. ലോകേഷ് കനകരാജ് ഒരുക്കിയ ലിയോ ആണ് ദളപതി വിജയ്‌യുടെ അടുത്ത റിലീസ്.