വീഴാതെ വാലിബ വീര്യം; രണ്ടാം ഭാഗത്തിൽ അമാനുഷികരുടെ പോരാട്ടം

മലയാളത്തിന്റെ മോഹൻലാലിനെ നായകനാക്കി ലിജോ ജോസ് പെല്ലിശ്ശേരി സംവിധാനം ചെയ്ത മലൈക്കോട്ടൈ വാലിബൻ ആദ്യ ദിനങ്ങളിലെ സമ്മിശ്ര പ്രതികരണങ്ങളെ അതിജീവിച്ചു കൊണ്ട് പ്രേക്ഷകരുടെ മനസ്സ് കവരുകയാണ്‌. ചില പ്രേക്ഷകർക്ക് ചിത്രവുമായി കണക്റ്റ് ചെയ്യാൻ കഴിഞ്ഞില്ലെങ്കിലും, ഒരു മുത്തശ്ശിക്കഥ പോലെ അവതരിപ്പിച്ച ചിത്രത്തിന്റെ സ്വഭാവം മനസ്സിലാക്കി സിനിമാ പ്രേമികൾ തീയേറ്ററുകളിലെത്തിയതോടെ വാലിബന് വലിയ സ്വീകരണം ലഭിച്ചു തുടങ്ങി. കേരളത്തിന് അകത്തും പുറത്തുമുള്ള സിനിമാ പ്രേമികളും നിരൂപകരും ഈ ലിജോ ജോസ് പെല്ലിശേരി ചിത്രത്തെ ഇപ്പോൾ പ്രശംസകൊണ്ട് മൂടുകയാണ്. ഇന്ത്യൻ സിനിമയിൽ തന്നെ ഇത്തരമൊരു സിനിമാനുഭവം ആദ്യമാണെന്നും, ലോക സിനിമയിൽ ഇന്ത്യൻ സിനിമയുടെ മികവിനെ അടയാളപ്പെടുത്തുന്ന ചിത്രമാണ് മലൈക്കോട്ടൈ വാലിബനെന്നും പ്രമുഖ നിരൂപകർ അഭിപ്രായപ്പെടുന്നു. ലിജോയുടെ സംവിധാന മികവിനൊപ്പം മോഹൻലാൽ കാഴ്ചവെച്ച അവിസ്മരണീയ പ്രകടനവും, മധു നീലകണ്ഠന്റെ വിസ്മയിപ്പിക്കുന്ന ദൃശ്യങ്ങളും പ്രശാന്ത് പിള്ളയുടെ സംഗീതവുമെല്ലാം വലിയ ചർച്ചയായി മാറുകയാണ്.

ഇപ്പോഴിതാ ഈ ചിത്രത്തിന്റെ രണ്ടാം ഭാഗത്തെ കുറിച്ചും മനസ്സ് തുറന്നിരിക്കുകയാണ് ലിജോ ജോസ് പെല്ലിശേരി. ഈ ചിത്രത്തിന്റെ രണ്ടാം ഭാഗം ഒരുക്കാനാവുമെന്നാണ് തന്റെ പ്രതീക്ഷയെന്നും, ആ രണ്ടാം ഭാഗം കൂടുതൽ വലിയ ചിത്രമായിരിക്കുമെന്നും അദ്ദേഹം പറയുന്നു. കൂടുതൽ വലിയ ആക്ഷൻ, സാഹസിക രംഗങ്ങൾ നിറഞ്ഞ, ഫാന്റസി ചിത്രമായിരിക്കും രണ്ടാം ഭാഗമെന്നാണ് അദ്ദേഹം സൂചിപ്പിക്കുന്നത്. അതിമാനുഷരായ മകന്റെയും അച്ഛന്റെയും പോരാട്ടം അവതരിപ്പിക്കുന്ന ഈ രണ്ടാം ഭാഗത്തിന്റെ ഭൂമിക ഇന്ത്യൻ അമർചിത്രകഥയുടേത് തന്നെയാണെങ്കിലും, ആദ്യ ഭാഗത്തിനേക്കാൾ വളരെയധികം വ്യത്യസ്തമായ ഒരു അവതരണ രീതിയായിരിക്കും രണ്ടാം ഭാഗത്തിന് ഉണ്ടാവുകയെന്നും ലിജോ പറഞ്ഞു. പ്രശസ്ത നിരൂപകൻ ഭരദ്വാജ് രംഗന് നൽകിയ അഭിമുഖത്തിലാണ് ലിജോ ഈ കാര്യങ്ങൾ വ്യക്തമാക്കിയത്