തലസ്ഥാനം ഇനി ലുസിഫർ ഭരിക്കും; ആരാധകർക്ക് ആവേശമായി മോഹൻലാൽ ഇനി തിരുവനന്തപുരത്ത്..!

യുവ സൂപ്പർ താരം പൃഥ്വിരാജ് സുകുമാരൻ മെഗാ താരം മോഹൻലാലിനെ നായകനാക്കി ഒരുക്കുന്ന ചിത്രമാണ് ലൂസിഫർ. മുരളി ഗോപി തിരക്കഥ രചിച്ച ഈ ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമ്മിക്കുന്നത്. ഇപ്പോൾ വണ്ടിപ്പെരിയാറിൽ ചിത്രീകരണം പുരോഗമിക്കുന്ന ലൂസിഫറിന്റെ ട്രിവാൻഡ്രം ഷെഡ്യൂൾ ഓഗസ്റ്റ് 12 മുതൽ ആരംഭിക്കും. ഇരുപത്തിയഞ്ചു വ്യത്യസ്ത ലൊക്കേഷനുകളിൽ ആണ് തിരുവനന്തപുരത്തു ഈ ചിത്രം ഷൂട്ട് ചെയ്യുക. തിരുവനന്തപുരം വിമൻസ് കോളേജിൽ ആണ് ലൂസിഫർ ആദ്യം ഷൂട്ട് ചെയ്യുക. അതിനു ശേഷം മോഡൽ സ്‌കൂളും കുതിരമാളികയും കാര്യവട്ടം ഗ്രീൻ ഫീൽഡ് സ്റ്റേഡിയവും പൂജപ്പുര സെൻട്രൽ ജയിലും തുടങ്ങി ഒട്ടേറെ ലൊക്കേഷനുകളിൽ ഈ ചിത്രം തിരുവനന്തപുരത്തു ചിത്രീകരിക്കും. നാൽപ്പതു ദിവസത്തെ ചിത്രീകരണമാണ് ഈ ചിത്രത്തിന് തിരുവനന്തപുരത്തു ഉണ്ടാവുക.

ഒരു മാസ്സ് പൊളിറ്റിക്കൽ ത്രില്ലർ ആയാണ് ലൂസിഫർ ഒരുങ്ങുന്നത്. ബോളിവുഡ് താരം വിവേക് ഒബ്‌റോയ്, ടോവിനോ തോമസ്, ഇന്ദ്രജിത്, മഞ്ജു വാര്യർ, മമത മോഹൻദാസ്, കലാഭവൻ ഷാജോൺ, ജോൺ വിജയ്, സച്ചിൻ ഖാഡെക്കാർ , ഫാസിൽ തുടങ്ങി ഒരു വമ്പൻ താര നിര തന്നെ ഈ ചിത്രത്തിന്റെ ഭാഗമാണ്. മെഗാ മാസ്സ് ലുക്കിലാണ് മോഹൻലാൽ ഈ ചിത്രത്തിൽ പ്രത്യക്ഷപ്പെടുന്നത്. ഹൈദരാബാദ്, മുംബൈ, എറണാകുളം തുടങ്ങിയ ലെക്കേഷനുകളിലും വിദേശത്തും ലൂസിഫർ ചിത്രീകരിക്കും എന്നാണ് റിപ്പോർട്ടുകൾ പറയുന്നത്. നൂറു ദിവസം കൊണ്ട് ചിത്രീകരണം പൂർത്തിയാക്കുന്ന ലൂസിഫർ അടുത്ത വർഷം ജനുവരി അല്ലെങ്കിൽ വിഷു റിലീസ് ആയാവും എത്തുക. കട്ട താടിയും പിരിച്ചു വെച്ച മീശയും വെളുത്ത മുണ്ടും ഷർട്ടുമിട്ടു കലിപ്പ് ലുക്കിൽ ഉള്ള മോഹൻലാലിൻറെ ലൂസിഫർ ലൊക്കേഷൻ സ്റ്റില്ലുകൾ ഇപ്പോഴേ സോഷ്യൽ മീഡിയയിൽ വൈറൽ ആണ്.