കെ ജി എഫ് 2നു ശേഷം ആ വെല്ലുവിളി ഏറ്റെടുക്കാൻ ഇനിയൊരു മലയാള ചിത്രം; മോഹൻലാലിന്റെ ബറോസ് റിലീസ് അപ്‌ഡേറ്റ് പുറത്ത്

കംപ്ലീറ്റ് ആക്ടർ മോഹൻലാൽ ആദ്യമായി സംവിധാനം ചെയ്ത ചിത്രമാണ് ബറോസ്; നിധി കാക്കും ഭൂതം. മോഹൻലാൽ തന്നെ നായകനായും അഭിനയിക്കുന്ന ഈ ചിത്രം ഇപ്പോഴതിന്റെ പോസ്റ്റ് പ്രൊഡക്ഷൻ സ്റ്റേജിലാണ്. വമ്പൻ ബഡ്ജറ്റില് ഒരു ത്രീഡി ഫാന്റസി ചിത്രമായി ഒരുക്കുന്ന ബറോസ് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് നിർമ്മിക്കുന്നത്. ചൈനീസ്, പോർച്ചുഗീസ്, സ്പാനിഷ് ഉൾപ്പെടെ ഇരുപതോളം ഭാഷകളിലാണ് ഈ ചിത്രം സബ് ടൈറ്റിൽ ഉപയോഗിച്ചും ഡബ്ബ് ചെയ്‌തും റിലീസ് ചെയ്യാൻ പ്ലാൻ ചെയ്യുന്നത്. ഒരു മലയാള സിനിമയ്ക്കു ലഭിക്കുന്ന ഏറ്റവും വലിയ റിലീസാവും ബറോസ് നേടാൻ പോകുന്നത്. ഇപ്പോഴിതാ ഈ ചിത്രത്തിന്റെ റിലീസ് അപ്‌ഡേറ്റ് പുറത്തു വിട്ടിരിക്കുകയാണ് മലയാളത്തിലെ പ്രശസ്ത ട്രേഡ് അനലിസ്റ്റായ എ ബി ജോർജ്. അടുത്ത വർഷം മാർച്ചിൽ, സമ്മർ റിലീസായാണ് ഈ ചിത്രത്തിന്റെ റിലീസ് പ്ലാൻ ചെയ്യുന്നതെന്നാണ് അദ്ദേഹം ട്വീറ്റ് ചെയ്തിരിക്കുന്നത്.

ഈ വർഷം തന്നെ സെൻസറിങ് പൂർത്തിയാക്കുന്ന ബറോസിന്റെ ട്രൈലെർ ഡിസംബറിൽ ഉണ്ടാകുമെന്നാണ് സൂചന. അടുത്ത വർഷം മാർച്ച്- ഏപ്രിൽ മാസത്തിലാണ് റംസാൻ നോയമ്പ് കടന്നു വരുന്നത്. സാധാരണ നോയമ്പ് സമയത്ത് തീയേറ്ററുകളിൽ ആള് കുറയും എന്നുള്ളതിനാൽ വലിയ ചിത്രങ്ങൾ, പ്രത്യേകിച്ച് മലയാള ചിത്രങ്ങളൊന്നും തന്നെ റിലീസ് ചെയ്യാറില്ല. എന്നാൽ ഈ വർഷം കെ ജി എഫ് 2 ആ വെല്ലുവിളി ഏറ്റെടുത്തു മുന്നോട്ടു വരികയും തീയേറ്ററുകളിൽ ആളെ കൂട്ടുകയും ചെയ്തു. ഏതായാലും കെ ജി എഫ് 2 ന്റെ പാത പിന്തുടർന്ന് കൊണ്ട് അടുത്ത വർഷം സമ്മർ സമയത്ത്, റംസാൻ നോയമ്പ് കാലത്തെ വെല്ലുവിളി ഏറ്റെടുത്തു കൊണ്ടാണ് ബറോസ് റിലീസ് ചെയ്യാൻ പ്ലാൻ ചെയ്യുന്നത്. ജിജോ നവോദയ തിരക്കഥ രചിച്ച ഈ ചിത്രത്തിൽ നാനൂറു വർഷം പ്രായമുള്ള ഒരു ഭൂതമായാണ് മോഹൻലാൽ അഭിനയിക്കുന്നത്.