നടിപ്പിൻ നായകന് ജന്മദിന ആശംസകളുമായി നടന വിസ്മയം; ആഘോഷമാക്കി ആരാധകർ..!

തമിഴകത്തിന്റെ നടിപ്പിൻ നായകൻ എന്നറിയപ്പെടുന്ന സൂര്യ ഇന്ന് തന്റെ ജന്മദിനം ആഘോഷിക്കുകയാണ്. അതിന്റെ ആവേശത്തിലാണ് ലോകമെമ്പാടുമുള്ള സൂര്യ ആരാധകരും സിനിമാ പ്രേമികളും. ഇന്നലെ മുതൽ തന്നെ സിനിമാ പ്രേമികളും സൂര്യ ആരാധകരും സിനിമ മേഖലയിലെ പ്രമുഖരും സൂര്യക്ക് ജന്മദിന ആശംസകളുമായി രംഗത്ത് വന്നു. ഇപ്പോഴിതാ സൂര്യക്ക് ജന്മദിന ആശംസയുമായി എത്തിയിരിക്കുന്നത് ഇന്ത്യൻ സിനിമയുടെ നടന വിസ്മയമായ മോഹൻലാൽ ആണ്. തന്റെ സോഷ്യൽ മീഡിയ പേജിലൂടെയാണ് മോഹൻലാൽ സൂര്യക്ക് സന്തോഷകരമായ ഒരു ജന്മദിനം ആശംസിച്ചതു. ഒരു കടുത്ത മോഹൻലാൽ ആരാധകൻ കൂടിയാണ് സൂര്യ. അത് പലപ്പോഴും പബ്ലിക് ആയി തന്നെ സൂര്യ തുറന്നു പറഞ്ഞിട്ടും ഉണ്ട്. അടുത്ത മാസം മോഹൻലാൽ- സൂര്യ ടീം ആദ്യമായി ഒന്നിച്ച തമിഴ് ചിത്രം റിലീസ് ചെയ്യാൻ പോവുകയാണ്. കെ വി ആനന്ദ് ഒരുക്കിയ കാക്കാൻ എന്ന ചിത്രത്തിൽ ആണ് മോഹൻലാൽ- സൂര്യ ടീം ഒന്നിച്ചത്.

ഇന്ത്യൻ പ്രധാന മന്ത്രി ആയി മോഹൻലാലും അദ്ദേഹത്തിന്റെ അംഗ രക്ഷകനായ എൻ എസ് ജി കമാൻഡോ ആയി സൂര്യയും ഈ ചിത്രത്തിൽ അഭിനയിക്കുന്നു. സായ്‌യേഷ നായികാ വേഷത്തിൽ എത്തുന്ന ഈ ബിഗ് ബജറ്റ് ചിത്രത്തിൽ മോഹൻലാലിന്റെ മകൻ ആയി എത്തുന്നത് ആര്യ ആണ്. ബൊമൻ ഇറാനി, സമുദ്രക്കനി എന്നിവരും അഭിനയിക്കുന്ന ഈ ചിത്രത്തിന് സംഗീതം ഒരുക്കിയത് ഹാരിസ് ജയരാജ്ഉം ഈ ചിത്രം നിർമ്മിച്ചിരിക്കുന്നത് ലൈക്ക പ്രൊഡക്ഷന്സും ആണ്. രണ്ടു ദിവസം മുൻപാണ് ഈ ചിത്രത്തിന്റെ ഓഡിയോ ലോഞ്ച് ചെന്നിയിൽ വെച്ച് നടന്നത്. തന്റെ നാൽപ്പതു വർഷത്തെ അഭിനയ ജീവിതത്തിൽ താൻ കണ്ടിട്ടുള്ള സഹ അഭിനേതാക്കളിൽ കഥാപാത്രത്തിനായി ഏറ്റവും കൂടുതൽ ആത്മാർപ്പണം ചെയ്യുന്ന ഒരാൾ ആണ് സൂര്യ എന്നാണ് മോഹൻലാൽ പറഞ്ഞത്