ബറോസ് തുടങ്ങുന്നതിനു മുൻപ് രണ്ടു ചിത്രങ്ങൾ ചെയ്യാനൊരുങ്ങി മോഹൻലാൽ..!

കംപ്ലീറ്റ് ആക്ടർ മോഹൻലാലിന്റെ ആദ്യ സംവിധാന സംരംഭമാണ് ബറോസ്, ദി ഗാർഡിയൻ ഓഫ് ഗാമാസ് ട്രെഷർ എന്ന ഫാന്റസി ത്രീഡി ചിത്രം. ആശീർവാദ് സിനിമാസ്, നവോദയ എന്നിവർ ചേർന്ന് നിർമ്മിക്കാൻ പോകുന്ന ഈ ചിത്രത്തിന് തിരക്കഥ ഒരുക്കിയിരിക്കുന്നത് മലയാള സിനിമയുടെ ചരിത്രത്തിലെ ഇതിഹാസങ്ങളിൽ ഒന്നായ ജിജോ പുന്നൂസ് ആണ്. മോഹൻലാൽ തന്നെ ടൈറ്റിൽ കഥാപാത്രത്തെ അവതരിപ്പിക്കുന്ന ഈ ബ്രഹ്മാണ്ഡ ചിത്രത്തിൽ അമേരിക്ക, പോർച്ചുഗൽ, സ്പെയിൻ, ഘാന തുടങ്ങിയ സ്ഥലങ്ങളിൽ നിന്നുള്ള താരങ്ങൾ അണിനിരക്കും. കെ യു മോഹനൻ ദൃശ്യങ്ങളൊരുക്കുന്ന ഈ ചിത്രത്തിന് സംഗീതമൊരുക്കുന്നത് ലിഡിയൻ നാദസ്വരവും അണിയറയിൽ പ്രവർത്തിക്കാൻ പോകുന്നത് ഹോളിവുഡിൽ നിന്നുള്ള സാങ്കേതിക പ്രവർത്തകരുമാണ്. എന്നാൽ ഇപ്പോൾ കൊറോണ ഭീതി തുടരുന്ന പശ്ചാത്തലത്തിൽ ഈ ചിത്രത്തിന്റെ ചിത്രീകരണം ഈ വർഷം അവസാനമോ അല്ലെങ്കിൽ അടുത്ത വർഷം ആദ്യമോ തുടങ്ങാനാണ് മോഹൻലാൽ പ്ലാൻ ചെയ്യുന്നത്. അതിനു മുൻപ് രണ്ടു മലയാള ചിത്രങ്ങളിൽ അഭിനയിക്കാനാണ് അദ്ദേഹത്തിന്റെ തീരുമാനം.

ലോക്ക് ഡൌൺ കഴിഞ്ഞാൽ ആദ്യം മോഹൻലാൽ ചെയ്യുന്നത് ജീത്തു ജോസഫ് സംവിധാനം ചെയ്യാൻ പോകുന്ന ദൃശ്യം 2 എന്ന ചിത്രത്തിലാണ്. ജീത്തു ജോസഫിന്റെ തന്നെ മോഹൻലാൽ ചിത്രമായ ദൃശ്യത്തിന്റെ രണ്ടാം ഭാഗമാണ് ഇത്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ഈ ചിത്രം അറുപത്‌ ദിവസം കൊണ്ട് തീർക്കാനാണ് പ്ലാൻ. ജീത്തു ജോസഫ്- മോഹൻലാൽ ടീമിന്റെ റാം എന്ന ചിത്രം ഇപ്പോൾ പകുതി ഷൂട്ടിംഗ് കഴിഞ്ഞു നിൽക്കുകയാണ്. ഈ വർഷമവസാനത്തോടെ വിദേശത്തു ചിത്രീകരിക്കേണ്ട അതിന്റെ ബാക്കി ഭാഗം കൂടി തീർക്കാനാവുമെന്നാണ് അണിയറ പ്രവർത്തകരുടെ പ്രതീക്ഷ. മോഹൻലാൽ നായകനായ ബ്രഹ്മാണ്ഡ ചിത്രം മരക്കാർ അറബിക്കടലിന്റെ സിംഹം അടുത്ത വർഷമാണ് റിലീസ് ചെയ്യൂ എന്നാണ് സൂചന.