മോഹൻലാൽ- ടിനു പാപ്പച്ചൻ ചിത്രം വരുന്നു; കൂടുതൽ വിവരങ്ങളിതാ

മലയാളത്തിന്റെ മഹാനടൻ മോഹൻലാൽ ഇനി ചെയ്യാൻ പോകുന്നത് ലിജോ ജോസ് പെല്ലിശ്ശേരി ഒരുക്കാൻ പോകുന്ന മലൈക്കോട്ടൈ വാലിബൻ എന്ന ചിത്രത്തിലാണ്. എന്നാൽ ഇപ്പോൾ വരുന്ന പുതിയ വാർത്തകൾ പറയുന്നത്, ലിജോ ജോസ് പെല്ലിശ്ശേരി ചിത്രത്തിന് ശേഷം, ലിജോയുടെ ശിഷ്യനും മലയാളത്തിലെ പ്രമുഖ സംവിധായകനുമായ ടിനു പാപ്പച്ചനൊപ്പം ഒരു ചിത്രം ചെയ്യാനുള്ള ഒരുക്കത്തിൽ കൂടിയാണ് മോഹൻലാൽ എന്നാണ്. മോഹൻലാൽ- ലിജോ ജോസ് പെല്ലിശ്ശേരി ചിത്രത്തിന്റെ ചീഫ് അസ്സോസിയേറ്റ് ഡയറക്ടർ കൂടിയാണ് ടിനു പാപ്പച്ചൻ. മോഹൻലാൽ- ടിനു ചിത്രത്തിന്റെ തിരക്കഥ പൂർത്തിയായി എന്നും, ഈ വർഷം അവസാനമോ അടുത്ത വർഷം ആദ്യമോ ഈ ചിത്രത്തിന്റെ ഷൂട്ടിംഗ് ആരംഭിക്കുമെന്നുമാണ് സ്ഥിതീകരിക്കാത്ത വിവരങ്ങൾ പറയുന്നത്. ആശീർവാദ് സിനിമാസ് ആയിരിക്കും ഈ ചിത്രം നിർമ്മിക്കുകയെന്നും വാർത്തകളുണ്ട്.

സ്വാതന്ത്ര്യം അർദ്ധരാത്രിയിൽ, അജഗജാന്തരം എന്നീ ചിത്രങ്ങൾ ചെയ്ത ടിനുവിന്റെ അടുത്ത റിലീസ് കുഞ്ചാക്കോ ബോബൻ, ആന്റണി വർഗീസ് എന്നിവർ ഒന്നിച്ച ചാവേർ ആണ്. ഇത് കൂടാതെ ദിലീപ് നായകനായി എത്തുന്ന ഒരു ചിത്രവും ടിനു പാപ്പച്ചൻ പ്ലാൻ ചെയ്യുന്നുണ്ട്. മോഹൻലാൽ ചിത്രത്തിന് മുൻപ് ദിലീപ് ചിത്രം തീർക്കാനാണ് ടിനുവിന്റെ ആലോചനയെന്നും റിപ്പോർട്ടുകൾ സൂചിപ്പിക്കുന്നു. ജീത്തു ജോസഫ് ഒരുക്കുന്ന രണ്ട് ഭാഗങ്ങളുള്ള റാം എന്ന ചിത്രത്തിന്റെ ഒരു മാസത്തെ ഷൂട്ടിംഗ് കൂടി മോഹൻലാലിന് ബാക്കിയുണ്ട്. ലിജോ ജോസ് പെല്ലിശ്ശേരി ചിത്രത്തിന് ശേഷം റാം പൂർത്തിയാക്കുന്ന മോഹൻലാൽ, അതിന് ശേഷം പൃഥ്വിരാജ് സംവിധാനം ചെയ്യാൻ പോകുന്ന ലൂസിഫറിന്റെ രണ്ടാം ഭാഗമായ എംപുരാൻ ചെയ്യും. മധു സി നാരായണൻ, രതീഷ് ബാലകൃഷ്ണ പൊതുവാൾ, അനൂപ് സത്യൻ എന്നിവർ ഒരുക്കുന്ന മലയാള ചിത്രങ്ങളും, ഋഷഭ എന്ന പാൻ ഇന്ത്യൻ ചിത്രവും മോഹൻലാൽ പ്ലാൻ ചെയ്യുന്നുണ്ട് എന്നാണ് വിവരം.