മായ അഭിനയത്തിലേക്ക് വരുമോ; അവതാരകയുടെ ചോദ്യത്തിന് മോഹൻലാലിന്റെ മറുപടി..!

കഴിഞ്ഞ ദിവസമാണ് മലയാളത്തിന്റെ നടന ഇതിഹാസങ്ങളിൽ ഒരാളായ മോഹൻലാൽ തന്റെ അറുപതാം പിറന്നാൾ ആഘോഷിച്ചത്. മലയാള സിനിമയുടെ ചരിത്രത്തിൽ ഇതുവരെ മറ്റൊരാൾക്ക് ലഭിക്കാത്തത്ര വലിയ ആഘോഷമാണ് കഴിഞ്ഞ ദിവസം ഈ നടന്റെ അറുപതാം പിറന്നാളിന് ലഭിച്ചത്. കേരളത്തിലെ പത്ര മാധ്യമങ്ങളും ദൃശ്യ മാധ്യമങ്ങളും മോഹൻലാൽ സ്പെഷ്യൽ പ്രോഗ്രാമുകളും ലേഖനങ്ങളുമായി മഹാനടന് ആദരം അർപ്പിച്ചപ്പോൾ സോഷ്യൽ മീഡിയയിൽ മോഹൻലാൽ അല്ലാതെ മറ്റൊന്നുമുണ്ടായിരുന്നില്ല ഇന്നലെ. ഓൺലൈൻ മാധ്യമങ്ങളും മലയാളത്തിന്റെ ഈ നടന വിസ്മയത്തിനു വേണ്ടി തങ്ങളുടെ ദിവസം മാറ്റി വെച്ചു. മോഹൻലാലിന് ആശംസകളുമായി ആരാധകരും സിനിമാ പ്രേമികളും അതുപോലെ ഇന്ത്യൻ സിനിമയിലെ പ്രമുഖ നടീനടന്മാരും സാങ്കേതിക പ്രവർത്തകരുമെല്ലാം മുന്നോട്ടു വന്നു. അതിനിടയിൽ ഒട്ടേറെ മാധ്യമങ്ങൾക്കു മോഹൻലാൽ ചെന്നൈയിലെ തന്റെ വീട്ടിൽ നിന്ന് വീഡിയോ കോൾ വഴി അഭിമുഖങ്ങളും കൊടുത്തിരുന്നു. അതിൽ ഒരു അഭിമുഖത്തിൽ അവതാരക ചോദിച്ചത് മോഹൻലാൽ, മകൻ പ്രണവ് എന്ന അപ്പു എന്നിവരെ പോലെ മകളായ വിസ്മയ എന്ന മായയും അഭിനയത്തിലേക്ക് വരുമോ എന്നായിരുന്നു.

അങ്ങനെ എന്തെങ്കിലും താല്പര്യം മകൾ പറഞ്ഞിട്ടുണ്ടോ എന്നായിരുന്നു മോഹൻലാലിനോടുള്ള ചോദ്യം. അതിനു മറുപടിയായി അദ്ദേഹം പറഞ്ഞത്. അങ്ങനെ ഒരാഗ്രഹം മകൾ ഇതുവരെ തന്നോട് പറഞ്ഞിട്ടില്ല എന്നും എന്നാൽ അവൾ നാടകങ്ങൾ ഒക്കെ ചെയ്യുന്ന ആളാണ് എന്നുമാണ്. മോഹൻലാലിന്റെ മകൾ വിസ്മയ ആയോധന കല പഠിക്കുന്ന ഒരു വീഡിയോ അടുത്തിടെ സോഷ്യൽ മീഡിയയിൽ വൈറൽ ആയിരുന്നു. അതിനു പുറമെ കവിതയെഴുതുകയും നന്നായി പടം വരക്കുകയും ചെയ്യുന്ന ഒരു കലാകാരി കൂടിയാണ് വിസ്മയ മോഹൻലാൽ. തന്റെ കവിതകളും ചിത്രങ്ങളുമടങ്ങിയ ഒരു ബുക്ക് വിസ്മയ ഈ വർഷം പ്രസിദ്ധീകരിച്ചിരുന്നു.