മോഹൻലാൽ – സിദ്ദിഖ് ചിത്രം ബിഗ് ബ്രദർ ഫസ്റ്റ് ലുക്ക് പോസ്റ്റർ എത്തി…!

പ്രശസ്ത സംവിധായകൻ സിദ്ദിഖ് മോഹൻലാലിനൊപ്പം ചെയ്യുന്ന മൂന്നാമത്തെ ചിത്രമാണ് ബിഗ് ബ്രദർ. ഈ മാസം പകുതിയോടെ ഷൂട്ടിംഗ് ആരംഭിച്ച ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ ഇന്ന് റിലീസ് ചെയ്തു. വളരെ സിമ്പിൾ ലുക്കിൽ ആണ് മോഹൻലാൽ ഈ പോസ്റ്ററിൽ പ്രത്യക്ഷപ്പെട്ടിരിക്കുന്നത്. ഈ ചിത്രത്തിൽ മോഹൻലാലിന് വേറെയും ഗെറ്റപ്പുകൾ ഉണ്ടെന്ന സ്ഥിതീകരിക്കാത്ത റിപ്പോർട്ടുകളും പുറത്തു വരുന്നുണ്ട്. സച്ചിദാനന്ദൻ എന്നാണ് മോഹൻലാലിന്റെ കഥാപാത്രത്തിന്റെ പേര് എന്നും അദ്ദേഹത്തിന്റെ നായികാ വേഷത്തിൽ എത്തുന്നത് പുതുമുഖമായ മിർണ മേനോൻ ആണെന്നും നേരത്തെ തന്നെ വാർത്തകൾ വന്നിരുന്നു. ഈ വർഷം ക്രിസ്മസിന് റിലീസ് ചെയ്യാൻ പാകത്തിന് ഒരുക്കുന്ന ഈ ചിത്രം പതിവ് സിദ്ദിഖ് ചിത്രങ്ങളെ പോലെ തന്നെ ഒരു കംപ്ലീറ്റ് ഫാമിലി എന്റെർറ്റൈനെർ ആയാവും ഒരുങ്ങുക.

എസ് ടാകീസ്, നിക്, വൈശാഖ സിനിമ എന്നിവയുടെ ബാനറിൽ സംവിധായകൻ സിദ്ദിഖ്, ജെൻസോ ജോസ്, വൈശാഖ് രാജൻ എന്നിവർ ചേർന്നാണ് ഈ ചിത്രം നിർമ്മിക്കുന്നത്. ഈ ചിത്രം രചിച്ചിരിക്കുന്നതും സംവിധായകൻ സിദ്ദിഖ് തന്നെയാണ്. ബോളിവുഡ് താരം അർബാസ് ഖാൻ, അനൂപ് മേനോൻ, വിഷ്ണു ഉണ്ണികൃഷ്ണൻ, ടിനി ടോം, സിദ്ദിഖ്, സറ്റ്ന ടൈറ്റസ് തുടങ്ങിയവർ ഈ ചിത്രത്തിന്റെ താര നിരയിൽ ഉണ്ട്. ദീപക് ദേവ് സംഗീതം ഒരുക്കുന്ന ഈ ചിത്രത്തിന് കാമറ ചലിപ്പിക്കുന്നത് ജിത്തു ദാമോദറും ഈ ചിത്രം എഡിറ്റ് ചെയ്യാൻ പോകുന്നത് ഗൗരി ശങ്കറും ആണ്. എണ്പതു ദിവസത്തിനു മുകളിൽ ഷൂട്ടിംഗ് പ്ലാൻ ചെയ്യുന്ന ബിഗ് ബ്രദറിന്റെ പ്രധാന ലൊക്കേഷനുകൾ, ആലപ്പുഴ, കൊച്ചി, മൈസൂർ, ബാംഗ്ലൂർ, മംഗലാപുരം എന്നിവയാണ് എന്നാണ് സൂചന.