അഞ്ച് ഭാഷകളിലായി മോഹൻലാൽ-പ്രിയദർശൻ ടീമിന്റെ ബ്രഹ്മാണ്ഡ ചിത്രം

മലയാള സിനിമയിലെ എക്കാലത്തെയും ഹിറ്റ് കൂട്ടുകെട്ട് മോഹൻലാൽ-പ്രിയദർശൻ ടീം വീണ്ടും ഒന്നിക്കുന്നു. അഞ്ച് ഭാഷകളിൽ ഒരുക്കുന്ന ഈ ബിഗ് ബഡ്ജറ്റ് ചിത്രം നിർമ്മിക്കുന്നത് മൂൺഷോട്ട് എന്റർടൈന്മെന്റിന്റെ ബാനറിൽ സന്തോഷ് ടി കുരുവിളയാണ്.

നിർമ്മാതാവ് സന്തോഷ് ടി കുരുവിള തന്നെയാണ് ഈ വിവരം പ്രേക്ഷകരോട് പങ്കുവെച്ചത്. 2018ൽ ചിത്രത്തിന്റെ ഷൂട്ടിങ് ആരംഭിക്കും. ഒരു മാസ്സ് ചിത്രം ആയിരിക്കും ഇതെന്ന് നിർമ്മാതാവ് അവകാശപ്പെടുന്നു.

2016ൽ ഇറങ്ങിയ ഒപ്പം ആയിരുന്നു മോഹൻലാലും പ്രിയദർശനും ഒന്നിച്ച അവസാന ചിത്രം. 50 കോടി ക്ലബ്ബിൽ ഇടം നേടിയ ഒപ്പത്തിന് ശേഷം ഈ ടീമിൽ നിന്നും പുതിയ ചിത്രം എത്തുമ്പോൾ പ്രതീക്ഷകൾ ഏറെയാണ്.

ശ്രീകുമാർ മേനോൻ സംവിധാനം ചെയ്യുന്ന ഒടിയൻ ആണ് മോഹൻലാലിന്റെ ഷൂട്ടിങ് പുരോഗമിക്കുന്ന പുതിയ ചിത്രം. ഒടിയന്റെ ഷൂട്ടിങ് കഴിഞ്ഞാൽ മോഹൻലാൽ അജോയ് വർമ്മയുടെ ചിത്രത്തിലാണ് ജോയിൻ ചെയ്യുക. അത് കഴിഞ്ഞാകും പ്രിയദർശൻ ചിത്രം ഒരുങ്ങുക.