മോഹൻലാൽ- പ്രിയദർശൻ ചിത്രത്തിന്റെ തിരക്കഥ പൂർത്തിയായി; മരക്കാർ വരുന്നത് ബ്രഹ്മാണ്ഡ ചിത്രമായി..!

മലയാള സിനിമയുടെ ചരിത്രത്തിലെ തന്നെ ഏറ്റവും വലിയ ചിത്രമാണ് മലയാളത്തിന്റെ താര ചക്രവർത്തി മോഹൻലാലും ഇന്ത്യൻ സിനിമയിലെ തന്നെ ഏറ്റവും മികച്ച സംവിധായകരിലൊരാളായ പ്രിയദർശനും ചേർന്നൊരുക്കാൻ പോകുന്നത്. മരക്കാർ; അറബിക്കടലിന്റെ സിംഹം എന്ന് പേരിട്ടിരിക്കുന്ന ഈ ചിത്രത്തിന്റെ തിരക്കഥ പൂർത്തിയായി കഴിഞ്ഞു, പ്രിയദർശൻ തന്നെയാണ് ഈ ചിത്രത്തിന് തിരക്കഥ ഒരുക്കിയിരിക്കുന്നത്. അന്തരിച്ചു പോയ സംവിധായകൻ ഐ വി ശശിയുടെ മകനായ അനി ഐ വി ശശി ആണ് ഈ ചിത്രത്തിന്റെ സഹ തിരക്കഥാകൃത്തായി ജോലി ചെയ്തത്. നൂറു കോടി രൂപയോളം മുതൽ മുടക്കിൽ ഒരുങ്ങാൻ പോകുന്ന ഈ ചിത്രം തമിഴ്, തെലുങ്ക്, ഹിന്ദി ഭാഷകളിലും എത്തുമെന്ന് മാത്രമല്ല തമിഴ്, ഹിന്ദി, തെലുങ്ക്, ബ്രിട്ടീഷ്, ചൈനീസ് നടന്മാരും ഈ ചിത്രത്തിന്റെ ഭാഗമാകും.

ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കാൻ പോകുന്ന ഈ ചിത്രത്തിന്റെ സഹനിർമ്മാതാക്കളായി മൂൺ ഷോട്ട് എന്റർടൈൻമെന്റ് ഉടമ സന്തോഷ് ടി കുരുവിളയും കോൺഫിഡന്റ് ഗ്രൂപ്പ് ചെയർമാൻ ഡോക്ടർ സി ജെ റോയിയും എത്തും. പ്രിയദർശന്റെ തൊണ്ണൂറ്റിയഞ്ചാമത്തെ ചിത്രമാണ് മരക്കാർ; അറബി കടലിന്റെ സിംഹം. സാബു സിറിൽ പ്രൊജക്റ്റ് ഡിസൈനർ ആയി എത്തുന്ന ഈ ചിത്രത്തിന്റെ കാമറ ചലിപ്പിക്കുന്നത് എസ് തിരു ആണെന്നാണ് സൂചന. മോഹൻലാൽ നായകനാവുമ്പോൾ മറ്റു പ്രധാന കഥാപാത്രങ്ങളായി ബോളിവുഡിൽ നിന്ന് സുനിൽ ഷെട്ടി, പരേഷ് റാവൽ എന്നിവരും തെലുങ്കിൽ നിന്ന് നാഗാർജുനയും എത്തുമെന്നും റിപ്പോർട്ടുകൾ ഉണ്ട്. ഈ വരുന്ന നവംബർ ഒന്ന് മുതൽ ചിത്രീകരണം ആരംഭിക്കാൻ പോകുന്ന ഈ ചിത്രം മൂന്നു മാസത്തോളം എടുത്താണ് ഷൂട്ട് ചെയ്യുക. പോസ്റ്റ്- പ്രൊഡക്ഷനായി ഒരുപാട് സമയമെടുക്കുന്ന ഈ ചിത്രത്തിന്റെ റിലീസ് തീയതി അടുത്ത വർഷം അവസാനത്തോടെ മാത്രമേ പ്രഖ്യാപിക്കു. ചരിത്രവും ഫിക്ഷനും ചേർത്താണ് ഈ ചിത്രത്തിന്റെ തിരക്കഥ ഒരുക്കിയിരിക്കുന്നത്.