മലയാളത്തിലെ ആദ്യത്തെ സൂപ്പർ ഹീറോ ആവാൻ ഒടിയൻ ഒരുങ്ങുന്നു..!

മലയാള സിനിമയിലെ ഏറ്റവും വലിയ ചിത്രമായി ഒരുങ്ങുന്ന സിനിമയാണ് മോളിവുഡിന്റെ താര ചക്രവർത്തിയായ മോഹൻലാൽ നായകനായി എത്തുന്ന ഒടിയൻ. വി എ ശ്രീകുമാർ മേനോൻ സംവിധാനം ചെയ്യുന്ന ഈ ചിത്രം നിർമ്മിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരും ഈ ചിത്രത്തിന് തിരക്കഥ ഒരുക്കിയിരിക്കുന്നത് ദേശീയ പുരസ്‍കാര ജേതാവായ ഹരികൃഷ്ണനും ആണ്. ഈ ചിത്രത്തിന്റെ ഫൈനൽ ഷെഡ്യൂൾ ഇന്നലെ മുതൽ പാലക്കാടു ആരംഭിച്ചു. മോഹൻലാലിൻറെ മീശ വടിച്ചുള്ള പുതിയ ഗെറ്റപ്പിൽ ഉള്ള ഭാഗങ്ങൾ ആവും ഈ ഷെഡ്യൂളിൽ ചിത്രീകരിക്കുക. ഈ ഷെഡ്യൂളിന് വേണ്ടി മോഹൻലാൽ അമ്പത്തഞ്ചു ദിവസം കൊണ്ട് ഇരുപതു കിലോയോളം കുറച്ചിരുന്നു. അങ്ങനെ ഒടിയൻ ആവാൻ വേണ്ടി മോഹൻലാൽ സ്വീകരിച്ച പുതിയ ലുക്ക് ഇന്ത്യൻ സിനിമയിൽ തന്നെ ചർച്ചാ വിഷയം ആയി മാറിയിരുന്നു.

ഇപ്പോഴിതാ ഒടിയൻ എന്ന ചിത്രത്തെ കുറിച്ച് സംവിധായകൻ ശ്രീകുമാർ മേനോൻ ഒരു മീഡിയ ഇന്റർവ്യൂവിൽ മനസ്സ് തുറന്നു കഴിഞ്ഞു. മലയാള സിനിമയിലെ ഫസ്റ്റ് സൂപ്പർ ഹീറോ ആയിരിക്കും ഒടിയൻ എന്നാണ് ശ്രീകുമാർ മേനോൻ പറയുന്നത്. നമ്മൾ സൂപ്പർ ഹീറോകളെ ഇഷ്ടപ്പെടുന്നത് അവരുടെ വിസ്മയിപ്പിക്കുന്നതും പ്രത്യേകതകൾ നിറഞ്ഞതുമായ ആക്ഷൻ രംഗങ്ങൾ കണ്ടു ആണെന്നും അതുപോലെ ഒരുപാട് വ്യത്യസ്തതകളും വിസ്മയങ്ങളും നിറഞ്ഞ ഒരുപാട് ആക്ഷനും മറ്റു ഘടകങ്ങളും ഉള്ള ചിത്രം ആയിരിക്കും ഒടിയൻ എന്നും ശ്രീകുമാർ മേനോൻ പറയുന്നു. ഒടിയൻ മാണിക്യൻ എന്ന കഥാപാത്രത്തെയാണ് മോഹൻലാൽ ഈ ചിത്രത്തിൽ അവതരിപ്പിക്കുന്നത്. ഇന്ത്യൻ സിനിമയിലെ തന്നെ ഏറ്റവും ദൈർഖ്യമേറിയ ക്ലൈമാക്സുകളിൽ ഒന്നാണ് ഒടിയൻ എന്ന ചിത്രത്തിന് വേണ്ടി ഒരുക്കിയിരിക്കുന്നത് . പീറ്റർ ഹെയ്‌ൻ ആണ് ഈ ചിത്രത്തിനും ആക്ഷൻ രംഗങ്ങൾ സംവിധാനം ചെയ്തിരിക്കുന്നത്.