മണിയുടെ ഓർമയിൽ ഇന്നും മലയാളികൾ; ഓർമ്മ പൂക്കളുമായി മോഹൻലാലും മമ്മൂട്ടിയും.!

മലയാളികളുടെ പ്രിയപ്പെട്ട മണികിലുക്കം നിലച്ചിട്ട് ഇന്നേക്ക് രണ്ടു വർഷം. നടനായും ഗായകനായും മലയാളികളുടെ മനസ്സിൽ സ്വന്തമായ ഒരു സ്ഥാനം കണ്ടെത്തിയ കലാകാരനായിരുന്നു കലാഭവൻ മണി. ഒന്നുമില്ലായ്മയിൽ നിന്നും ജനകോടികളുടെ പ്രിയപ്പെട്ട മണി ചേട്ടനായി മാറിയ ഈ കലാകാരൻ ശൂന്യമാക്കി പോയ ഇരിപ്പിടം ഇന്നും എന്നും ഒഴിഞ്ഞു തന്നെ കിടക്കും എന്നതിന് സംശയമൊന്നുമില്ല. കാരണം മണിയെ പോലെ മണി മാത്രമേ ഉള്ളു. ആ പ്രതിഭക്കു പകരം വെക്കാൻ , ആ നഷ്ടത്തിന് പകരം വെക്കാൻ മലയാളികൾക്ക് ഇനി വേറൊരാൾ ഉണ്ടാവില്ല എന്നതും പകൽ പോലെ വ്യക്‌തമായ കാര്യമാണ്. ഇന്ന് മണിയുടെ രണ്ടാം ചരമ ദിനം ആചരിക്കുന്ന ഈ വേളയിൽ മണിക്ക് ഓർമ്മ പൂക്കളുമായി എത്തിയത് ഇന്ത്യൻ സിനിമയുടെ കമ്പ്ലീറ്റ് ആക്ടർ ആയ മോഹൻലാലും മലയാള സിനിമയുടെ മെഗാ സ്റ്റാർ ആയ മമ്മൂട്ടിയും ആണ്.

രണ്ടും പേരും തങ്ങളുടെ ഒഫീഷ്യൽ ഫേസ്ബുക് പേജിലൂടെയാണ് മണിക്ക് ഓർമ്മ പൂക്കൾ അർപ്പിച്ചത്. മോഹൻലാലിനൊപ്പവും മമ്മൂട്ടിക്ക് ഒപ്പവും ഒട്ടേറെ ചിത്രങ്ങളിൽ അഭിനയിച്ചിട്ടുള്ള മണിക്ക് രണ്ടു പേരോടും അടുത്ത സൗഹൃദവും ഉണ്ടായിരുന്നു. മണി മരിക്കുന്ന ആ സമയങ്ങളിൽ മോഹൻലാലിൻറെ നേതൃത്വത്തിൽ മണിയുടെ കരൾ മാറ്റി വെക്കാനുള്ള ഒരു ശസ്ത്രക്രിയക്കുള്ള ഒരുക്കങ്ങളും പൂർത്തിയായി വരികയായിരുന്നു. അതിനിടക്ക് ആണ് മണി നമ്മളെ വിട്ടു പോയത്. ഇനി എത്ര നാൾ കഴിഞ്ഞാലും മണി മലയാളി മനസ്സിൽ മരിക്കാതെ തന്നെ തങ്ങി നിൽക്കും. ഇന്ന് കലാഭവൻ മണിയുടെ ജീവിതത്തെ അടിസ്ഥാനമാക്കി ഒരുക്കിയ ചാലക്കുടിക്കാരൻ ചങ്ങാതി എന്ന ചിത്രത്തിന്റെ ഫസ്റ്റ് ലുക്ക് പോസ്റ്ററും റിലീസ് ചെയ്തിരുന്നു. വിനയൻ ആണ് ഈ ചിത്രം സംവിധാനം ചെയ്തിരിക്കുന്നത്. മിനിസ്‌ക്രീനിലൂടെ ശ്രദ്ധേയനായ രാജാമണിയാണ് ഈ ചിത്രത്തിൽ മണിയുടെ വേഷം അവതരിപ്പിക്കുന്നത്.