സഖാവ് കോടിയേരി ബാലകൃഷ്ണന് ആദരാഞ്ജലികളുമായി മോഹൻലാലും മമ്മൂട്ടിയും

ഇന്നലെയാണ് പ്രശസ്ത രാഷ്ട്രീയ നേതാവ് സഖാവ് കോടിയേരി ബാലകൃഷ്ണൻ അന്തരിച്ചത്. ദീർഘ നാളായി അർബുദ ബാധയെ തുടർന്ന് ചികിത്സയിലായിരുന്ന അദ്ദേഹത്തിന് എഴുപത് വയസ്സായിരുന്നു. മന്ത്രിയായും ജനപ്രതിനിധിയായും മികച്ച സേവനമനുഷ്ഠിച്ചിട്ടുള്ള അദ്ദേഹത്തിന് ആദരാഞ്ജലികൾ അർപ്പിച്ചു കൊണ്ട് മലയാള സിനിമാ ലോകവും മുന്നോട്ടു വരികയാണ്. മലയാള സിനിമയിലെ മഹാനടന്മാരായ മോഹൻലാൽ, മമ്മൂട്ടി എന്നിവർ തങ്ങളുടെ സോഷ്യൽ മീഡിയ പേജിലൂടെ അദ്ദേഹത്തിന് ആദരാഞ്ജലികൾ അർപ്പിച്ചു. മമ്മൂട്ടി ഇപ്പോൾ ഖത്തറിലും മോഹൻലാൽ ബ്രിട്ടനിലും ആയത് കൊണ്ട് തന്നെ അന്തിമോപചാരം അർപ്പിക്കാൻ അവർക്ക് നേരിട്ടെത്തിചേരാൻ സാധിക്കില്ല. കോടിയേരി ബാലകൃഷ്ണനുമായി അടുത്ത ബന്ധം പുലർത്തിയിരുന്നവർ ആയിരുന്നു മോഹൻലാലും മമ്മൂട്ടിയും. “പ്രിയ സുഹൃത്തും അഭ്യുദയകാംക്ഷിയും ആയിരുന്ന കോടിയേരി ബാലകൃഷ്ണന് ആദരാഞ്ജലികൾ..” എന്നാണ് മമ്മൂട്ടി തന്റെ സോഷ്യൽ മീഡിയ പേജിൽ കുറിച്ചത്.

കുറച്ചു കൂടി ദീർഘമായ കുറിപ്പാണു മോഹൻലാൽ തന്റെ സോഷ്യൽ മീഡിയ പേജിൽ കുറിച്ചത്. “സംശുദ്ധ രാഷ്ട്രീയത്തിൻ്റെ വഴിയിലൂടെ ജനഹൃദയങ്ങളിലേക്ക് നടന്നുകയറിയ പ്രിയപ്പെട്ട ശ്രീ കോടിയേരി ബാലകൃഷ്ണന് വേദനയോടെ ആദരാഞ്ജലികൾ. ജനപ്രതിനിധിയായും മന്ത്രിയായും മാതൃകാപരമായ നേതൃത്വം നിർവഹിച്ച അദ്ദേഹം വ്യക്തിപരമായി എനിക്ക് നല്ലൊരു സുഹൃത്തായിരുന്നു. ദീർഘനാളത്തെ ബന്ധമായിരുന്നു അദ്ദേഹവുമായി ഉണ്ടായിരുന്നത്. ആ സ്നേഹനിധിക്ക് കണ്ണീരോടെ വിട”, എന്നായിരുന്നു മോഹൻലാലിന്റെ വാക്കുകൾ. കുഞ്ചാക്കോ ബോബൻ, അജു വർഗീസ്, നിവിൻ പോളി, മാല പാർവതി, സംവിധായകൻ വൈശാഖ്, എൻ എം ബാദുഷ, ആന്റോ ജോസഫ്, ഷാജി കൈലാസ്, സംവിധായകൻ ബി ഉണ്ണികൃഷ്ണൻ, മുകേഷ്, സുരാജ് വെഞ്ഞാറുമൂട്, ഇന്നസെന്റ്, ശരത് അപ്പാനി, ആന്റണി പെരുമ്പാവൂർ തുടങ്ങിയവരും അദ്ദേഹത്തിന് ആദരാഞ്ജലികൾ അർപ്പിച്ചു കൊണ്ട് മുന്നോട്ടു വന്നിട്ടുണ്ട്.