താരങ്ങളുടെ വമ്പൻ പ്രതിഫല തുക പുറത്ത്; പ്രതിഫലം കുറയ്ക്കണമെന്ന് നിർമ്മാതാക്കൾ..

കോവിഡ് 19 ഭീഷണി മൂലം മൂന്നു മാസത്തോളമായി അടച്ചിട്ടിരിക്കുന്ന മലയാള സിനിമാ ലോകം ഇപ്പോൾ വലിയ പ്രതിസന്ധിയിലൂടെയാണ് കടന്നു പോകുന്നത്. തീയേറ്ററുകൾ എന്ന് തുറക്കാൻ പറ്റുമെന്നോ സിനിമാ പ്രവർത്തനങ്ങൾ എന്ന് മുതൽ ആരംഭിക്കാൻ പറ്റുമെന്നോ ആർക്കും ഒരു നിശ്‌ചയവുമില്ലാത്ത അവസ്ഥ. ഒട്ടേറെ ചിത്രങ്ങൾ റിലീസ് കാത്തു കിടക്കുന്നു. അതുപോലെ ഷൂട്ടിംഗ് പോസ്റ്റ് പ്രൊഡക്ഷൻ ജോലികൾ പൂർത്തിയാക്കാൻ കഴിയാതെ കിടക്കുന്ന ചിത്രങ്ങൾ വേറെയും. ഈ സാഹചര്യത്തിൽ ഇനി കുറെ നാൾ ബിഗ് ബജറ്റ് ചിത്രങ്ങളുടെ നിർമ്മാണം മലയാള സിനിമയ്ക്കു താങ്ങാൻ ആവില്ലെന്നും അതിന്റെ ഭാഗമായി ചിത്രങ്ങളുടെ നിർമ്മാണ ചെലവ് പുറത്തു കൊണ്ട് വറ്റുന്നതിന്റെ ഭാഗമായി താരങ്ങളും സാങ്കേതിക പ്രവർത്തകരും തങ്ങളുടെ പ്രതിഫലം പകുതി ആയെങ്കിലും കുറക്കണമെന്നുമാണ് നിർമ്മാതാക്കളുടെ ആവശ്യം. ഇപ്പോഴിതാ മലയാളത്തിലെ പ്രമുഖ താരങ്ങളുടെ പ്രതിഫല തുക മീഡിയ വൺ ചാനെൽ കഴിഞ്ഞ ദിവസം പുറത്തു വിട്ടിരിക്കുകയാണ്. നിർമ്മാതാക്കളിൽ നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് അവർ പ്രതിഫല തുക സംബന്ധിച്ച വിവരങ്ങൾ പുറത്തു വിട്ടത്.

അത് പ്രകാരം മലയാളത്തിൽ ഏറ്റവും പ്രതിഫലം പറ്റുന്ന താരം മോഹൻലാൽ ആണ്. നാല് മുതൽ എട്ടു കോടി വരെയാണ് സിനിമയുടെ വലിപ്പമനുസരിച്ചു മോഹൻലാൽ വാങ്ങുന്ന പ്രതിഫലം. മമ്മൂട്ടി രണ്ടു മുതൽ മൂന്ന് കോടി വരെ വാങ്ങുമ്പോൾ ദിലീപ് വാങ്ങുന്നത് രണ്ടു മുതൽ രണ്ടര കോടി വരെയാണ്. പൃഥ്വിരാജ് സുകുമാരൻ ഒന്നര മുതൽ രണ്ടു കോടി വരെയാണ് പ്രതിഫലം വാങ്ങുന്നതെങ്കിൽ നിവിൻ പോളിയുടെ പ്രതിഫലം ഒരു കോടിയാണ്. ദുൽഖർ സൽമാൻ എഴുപത്തിയഞ്ച് ലക്ഷം രൂപ വാങ്ങുമ്പോൾ ഫഹദ് ഫാസിൽ അറുപത്തിയഞ്ച് മുതൽ എഴുപത്തിയഞ്ച് ലക്ഷം വരെയാണ് വാങ്ങുന്നതെന്നും റിപ്പോർട്ടിൽ പറയുന്നു. സുരേഷ് ഗോപി എഴുപതു ലക്ഷമാണ് വാങ്ങുന്നതെന്നും അതിൽ പറയുന്നുണ്ട്.