ആരാധകർ കാത്തിരുന്ന മോഹൻലാലിന്റെ കുഞ്ഞാലി മരക്കാർ പ്രഖ്യാപനം ഇന്ന്?

ആരാധകർ ഒന്നടങ്കം കാത്തിരുന്ന കുഞ്ഞാലി മരക്കാർ പ്രഖ്യാപനം ഇന്ന് നടക്കും എന്ന സൂചനകളാണ് ലഭിക്കുന്നത്. പ്രിയദർശന്റെ സംവിധാനത്തിൽ മോഹൻലാൽ നായകനായി എത്തുന്ന ചിത്രം കുഞ്ഞാലി മരക്കാർ ഔദ്യോഗികമായി പ്രഖ്യാപിച്ചിരുന്നില്ലെങ്കിലും ഉണ്ടാവുമെന്ന് മുൻപ് തന്നെ വാർത്തകൾ പുറത്ത് വന്നിരുന്നു. പ്രിയദർശനും അതിനെ സ്ഥിതീകരിക്കുന്ന മറുപടികൾ ആണ് നൽകിയത്. അതേ സമയം മമ്മൂട്ടിയെ നായകനാക്കി ഒരുക്കാൻ പ്രഖ്യാപിച്ചിരുന്ന കുഞ്ഞാലി മരക്കാറിന്റെ മറ്റ് വിവരങ്ങൾ ഒന്നും പുറത്ത് വരാത്തതും മോഹൻലാൽ ചിത്രത്തിന്റെ സാധ്യത വർദ്ധിപ്പിക്കുന്നു.

കോണ്ഫിഡന്റ് ഗ്രൂപ്പ് ഉടമയും മോഹൻലാൽ നായകനായി എത്തിയ ബിഗ് ബജറ്റ് ചിത്രം കാസനോവയുടെ നിർമ്മാതാവും ആയിരുന്ന സി. ജെ. റോയ് ആണ് വിവരം പുറത്ത് വിട്ടത്. മലയാളത്തിലെ ഏറ്റവും വലിയ ചിത്രത്തിനായി കാത്തിരിക്കൂ എന്നാണ് അദ്ദേഹം പറഞ്ഞത്. ഇന്ത്യൻ സമയം നാലരയോടെ അദ്ദേഹം ഫേസ്‌ബുക്ക് ലൈവിൽ എത്തി പ്രേക്ഷകരോട് പ്രഖ്യാപനം നടത്തും എന്നാണ് അറിയിച്ചിരിക്കുന്നത്. ചിത്രത്തിലെ താരങ്ങളും സംവിധായകരും ഒപ്പം ഉണ്ടാകും എന്നാണ് വരുന്ന സൂചനകൾ. വാർത്ത പുറത്ത് വന്നതോടെ പ്രേക്ഷകരെ വലിയ കാത്തിരിപ്പിലാണ്. രണ്ടായിരം കോടി മുതൽ മുടക്കിൽ രണ്ടാമൂഴം ഉണ്ടാകുമെന്ന് മുൻപ് പ്രഖ്യാപിച്ചിരുന്നു. വി. എ. ശ്രീകുമാർ മേനോൻ ആയിരിക്കും രണ്ടാമൂഴം സംവിധാനം ചെയ്യുന്നത്. അതിന് മുന്നോടിയായി ഇരുവരും ഒന്നിക്കുന്ന ചിത്രം ഒടിയൻ 40 കോടിയോളം മുതൽ മുടക്കിൽ ഒരുങ്ങുന്ന വമ്പൻ ചിത്രമാണ്. ബിഗ് ബജറ്റ് ചിത്രങ്ങളുടെ ഉത്സവകാലത്ത് ഒടിയനോടൊപ്പം മമ്മൂട്ടിയുടെ മാമാങ്കം, പൃഥ്വിരാജ് നായകനാകുന്ന കാളിയൻ, നിവിൻ പോളിയുടെ കായംകുളം കൊച്ചുണ്ണി തുടങ്ങിയവയും ഒരുങ്ങുന്നുണ്ട്.