മോഹൻലാൽ- ജീത്തു ജോസെഫ് ചിത്രം റാം ചിത്രീകരണം ആരംഭിച്ചു

കംപ്ലീറ്റ് ആക്ടർ മോഹൻലാലിനെ നായകനാക്കി ജീത്തു ജോസഫ് സംവിധാനം ചെയ്യുന്ന റാം എന്ന സിനിമയുടെ ചിത്രീകരണം ഇന്ന് മുതൽ ആരംഭിച്ചു. ഡിസംബർ പതിനാറിന് ലോഞ്ച് ചെയ്ത ഈ ചിത്രം പൂജാ ചടങ്ങുകളോടെ ഇന്നാണ് ഷൂട്ടിംഗ് ആരംഭിച്ചത്. ചിത്രത്തിലെ ഒരു ലൊക്കേഷൻ സ്റ്റിൽ ഷെയർ ചെയ്തുകൊണ്ട് മോഹൻലാൽ തന്നെയാണ് താൻ റാമിൽ ജോയിൻ ചെയ്ത വിവരം ഏവരെയും അറിയിച്ചത്. ദൃശ്യം എന്ന ഇൻഡസ്ട്രി ഹിറ്റ് ചിത്രത്തിന് ശേഷം മോഹൻലാൽ – ജീത്തു ജോസഫ് ടീം ഒന്നിക്കുന്ന ചിത്രമാണ് ഇത്. തെന്നിന്ത്യൻ താര സുന്ദരി തൃഷയാണ് ഇതിലെ നായികാ വേഷം ചെയ്യുന്നത്. ഇവർക്കൊപ്പം ഒരു വലിയ താര നിര തന്നെ ഈ ചിത്രത്തിൽ അണിനിരക്കുന്നുണ്ട്.

ബോളിവുഡ് താരം ആദിൽ ഹുസ്സൈൻ, ഇന്ദ്രജിത് സുകുമാരൻ, സായി കുമാർ, സിദ്ദിഖ്, കലാഭവൻ ഷാജോൺ, ലിയോണ ലിഷോയ്, ദുർഗാ കൃഷ്ണ തുടങ്ങി ഒട്ടേറെ പേര് ചിത്രത്തിൽ ഉണ്ട്. ഒന്നിലധികം രാജ്യങ്ങളിൽ ആയി ചിത്രീകരിക്കാൻ പോകുന്ന ഈ സിനിമ ഈ വർഷം ഓണം അല്ലെങ്കിൽ പൂജ റിലീസ് ആയി എത്തിക്കാൻ ആണ് പ്ലാൻ. അഭിഷേക് ഫിലിംസ് നിർമ്മിക്കുന്ന ഈ ബിഗ് ബജറ്റ് ചിത്രം വിതരണം ചെയ്യുന്നത് ആശീർവാദ് സിനിമാസ് ആണ്. ലണ്ടൻ, കൊളംബോ, കെയ്റോ, ഡൽഹി, ധനുഷ്‌കോടി തുടങ്ങി ഒട്ടേറെ സ്ഥലങ്ങളിൽ ഈ ചിത്രത്തിന് ഷൂട്ട് ഉണ്ട്. നൂറു ദിവസത്തെ ഒറ്റ ഷെഡ്യൂൾ ആയി റാം തീർക്കാൻ ആണ് പ്ലാൻ എന്ന് ജീത്തു ജോസഫ് പറയുന്നു. ഇതൊരു റിയലിസ്റ്റിക് ടച്ചുള്ള മാസ്സ് ആക്ഷൻ ത്രില്ലർ ആണെന്നാണ് ജീത്തു ജോസഫ് അറിയിച്ചത്.