ബിഗ് ബോസ്സ് അവതാരകനായി മോഹൻലാൽ എത്തുന്നു?

ഇന്ത്യയിലെ ഏറ്റവും വലിയ റിയാലിറ്റി ഷോയായ ബിഗ് ബോസ്സിന്റെ മലയാളം പതിപ്പ് ഒരുങ്ങുകയാണ്. ബോളിവുഡിൽ തരംഗമായി മാറിയ ബിഗ് ബോസ്സ് സൗത്ത് ഇന്ത്യയിലേക്കും എത്തിയിരുന്നു. തെലുങ്കിലും തമിഴിലും ഇതിനോടകംതന്നെ ശ്രദ്ധേയമായി മാറിയ ബിഗ് ബോസ്സ് ഇപ്പോഴിതാ മലയാളത്തിലേക്കും എത്തുന്നു എന്നാണ് വാർത്തകൾ വരുന്നത്. ബോളിവുഡിൽ സൽമാൻഖാനും അമിതാബ് ബച്ചനും ഉൾപ്പടെയുള്ള സൂപ്പർ താരങ്ങൾ അവതരിപ്പിച്ച ബിഗ് ബോസ്സ് വലിയ തരംഗം സൃഷ്ടിച്ചിരുന്നു. തെലുങ്കിൽ ജൂനിയർ എൻ. ടി. ആറും, തമിഴിൽ സൂപ്പർതാരം കമൽ ഹാസനും ആണ് അവതാരകനായി വന്നത്. മലയാളത്തിൽ ആരാകും എന്ന ആകാംക്ഷകൾക്കുള്ള മറുപടിയാണ് ഇപ്പോൾ പുറത്തുവന്നു കൊണ്ടിരിക്കുന്നത്. മലയാളികളുടെ പ്രിയനടൻ മോഹൻലാൽ ബിഗ് ബോസ്സിന്റെ മലയാളം പതിപ്പ് അവതരിപ്പിക്കുമെന്നാണ് ഇപ്പോൾ വരുന്ന വാർത്തകൾ സൂചിപ്പിക്കുന്നത്.

മമ്മൂട്ടി, സുരേഷ് ഗോപി തുടങ്ങി മലയാളത്തിലെ പ്രമുഖ നടന്മാരുടെ എല്ലാം പേര് അവതാരകനായി പരിഗണിച്ചിരുന്നെങ്കിലും മോഹൻലാൽ ആയിരിക്കും അവതാരകനായി എത്തുന്നത് എന്നാണ് അറിയാൻ കഴിയുന്നത്. പരിപാടിയിൽ മലയാളത്തിലെ പ്രമുഖ സിനിമ ചലച്ചിത്ര താരങ്ങൾ പങ്കെടുക്കും. നൂറോളം ദിവസം അവരെ ഒരു വീടിനുള്ളിൽ താമസിപ്പിച്ച് പ്രകടനം വിലയിരുത്തുന്നതാണ് ബിഗ് ബോസ്സിന്റെ പ്രവർത്തന സ്വഭാവം. ഒന്നാമതെത്തുന്ന മത്സരാർത്ഥിക്ക് വലിയ സമ്മാനങ്ങളും കാത്തിരിക്കുന്നു. ഏഷ്യാനെറ്റ് ഫിലിം അവാർഡ്സിൽ ബിഗ് ബോസ്സിന്റെ പ്രഖ്യാപനം ഉണ്ടാകും എന്നാണ് അറിയാൻ കഴിയുന്നത്. മെയ് അവസാനത്തോടുകൂടി ബിഗ് ബോസിന്റെ ഒഫീഷ്യൽ പ്രഖ്യാപനം എത്തുമെന്നും പറയപ്പെടുന്നു. ലാൽസലാം ആണ് ഇതിനു മുൻപ് മോഹൻലാൽ ടിവി ചാനലിൽ അവതാരകനായി എത്തിയ പരിപാടി.