ഭീമനായി മോഹൻലാൽ; ആവേശം കൊള്ളിക്കുന്ന ഫാൻ മേഡ് പോസ്റ്റർ

മലയാളത്തിന്റെ മഹാനടൻ മോഹൻലാലിനെ നായകനാക്കിയൊരുക്കാൻ പ്ലാൻ ചെയ്ത ബ്രഹ്മാണ്ഡ ചിത്രമാണ് രണ്ടാമൂഴം. എം ടി വാസുദേവൻ നായരുടെ മാസ്റ്റർപീസ് ആയ നോവലിനെ അധികരിച്ചു അദ്ദേഹം തന്നെ മലയാളത്തിലും ഇംഗ്ലീഷിലും തിരക്കഥയൊരുക്കിയ ഈ ചിത്രം ശ്രീകുമാർ മേനോനാണ് സംവിധാനം ചെയ്യാനിരുന്നത്. എന്നാൽ സംവിധായകനും തിരക്കഥാ രചയിതാവുമായുള്ള തർക്കം മൂലം ഇപ്പോൾ ഈ പ്രോജക്ട് നടക്കുമോ ഇല്ലയോ എന്നത് പോലും കോടതി വിധിയുടെ അടിസ്ഥാനത്തിലേ പറയാൻ കഴിയൂ എന്ന സാഹചര്യമാണുള്ളത്. എന്നാൽ ഈ ചിത്രം നടക്കുകയാണെങ്കിൽ ഭീമനായി മോഹൻലാൽ ആണ് അഭിനയിക്കു എന്നു എം ടി വാസുദേവൻ നായർ തന്നെ പറഞ്ഞിട്ടുള്ളതിനാൽ ആരാധകരും സിനിമാ പ്രേമികളും ഏറെ പ്രതീക്ഷയിൽ തന്നെയാണ്. ഇപ്പോഴിതാ സോഷ്യൽ മീഡിയയിൽ തരംഗമാകുന്നത് ഭീമന്റെ ഗെറ്റപ്പിലുള്ള മോഹൻലാലിന്റെ ഒരു ഫാൻ മേഡ് ചിത്രമാണ്.

ഈ ചിത്രം കൂടി പുറത്തു വന്നതോടെ രണ്ടാമൂഴം നടക്കുമോയെന്നുള്ള ചർച്ചകൾ വീണ്ടും ചൂട് പിടിച്ചു കഴിഞ്ഞു. ഈ ചിത്രം പ്രിയദർശൻ സംവിധാനം ചെയ്യുമെന്നും, മോഹൻലാൽ-പ്രിയദർശൻ ചിത്രമായ മരക്കാർ അറബിക്കടലിന്റെ സിംഹത്തിന്റെ റിലീസിന് ശേഷം രണ്ടാമൂഴം ഒഫീഷ്യലായി പ്രഖ്യാപിക്കുമെന്നും സ്ഥിതീകരിക്കാത്ത റിപ്പോർട്ടുകൾ വരുന്നുണ്ട്. എം ടി സാറിന്റെ തിരക്കഥയിലൊരു ചിത്രം തന്റെ സ്വപ്‌നമാണെന്ന്‌ പ്രിയദർശൻ നേരത്തെ തന്നെ വെളിപ്പെടുത്തിയിട്ടുണ്ട്. നേരത്തെ എം ടി- ഹരിഹരൻ ടീമും ഈ ചിത്രം മോഹൻലാലിനെ നായകനാക്കിയൊരുക്കാൻ പ്ലാൻ ചെയ്തിരുന്നു. എന്നാൽ ഇത് രണ്ട് ഭാഗങ്ങളാക്കിയൊരുക്കണം എന്ന എം ടി യുടെ നിർദ്ദേശത്തോട് ഹരിഹരന് യോജിക്കാൻ കഴിയാത്തത് കൊണ്ട് അന്ന് ആ പ്രോജക്ട് നിന്നുപോവുകയായിരുന്നു. ഏതായാലും മോഹൻലാൽ എന്ന മഹാനടൻ ഭീമനായി വെള്ളിത്തിരയിലെത്തുമെന്ന പ്രതീക്ഷയിലാണ് പ്രേക്ഷകർ.