വിജയ്‌ക്കൊപ്പം മോഹൻലാൽ, വിജയ് സേതുപതി; ദളപതി 69 ഒരുങ്ങുന്നത് ബ്രഹ്മാണ്ഡ ചിത്രമായി?

ദളപതി വിജയ് നായകനാവുന്ന അവസാന ചിത്രമായ ദളപതി 69 ഇന്ന് പ്രഖ്യാപിക്കും. കെ വി എൻ പ്രൊഡക്ഷൻ നിർമ്മിക്കുന്ന ഈ ചിത്രത്തിന്റെ പ്രഖ്യാപനം ഇന്ന് വൈകുന്നേരം അഞ്ച് മണിക്കാണ് നടക്കുക. സതുരംഗ വേട്ടൈ, ധീരൻ അധികാരം ഒൺഡ്രൂ, നേർക്കൊണ്ട പാർവൈ, വാലിമയ്, തുനിവ് എന്നീ ചിത്രങ്ങൾ സംവിധാനം ചെയ്ത എച്ച് വിനോദ് ആണ് ദളപതി വിജയ്‌യുടെ അവസാന ചിത്രം ഒരുക്കുക എന്നാണ് വാർത്തകൾ വരുന്നത്.

ഇപ്പോഴിതാ, ഈ ചിത്രത്തിന്റെ താരനിരയെ കുറിച്ചും സ്ഥിരീകരിക്കാത്ത വിവരങ്ങൾ പ്രചരിക്കുകയാണ്‌. മലയാളത്തിന്റെ മഹാനടൻ മോഹൻലാൽ, തമിഴിലെ മക്കൾ സെൽവൻ വിജയ് സേതുപതി എന്നിവർ ഈ ചിത്രത്തിന്റെ ഭാഗമാകുമെന്നാണ് വാർത്തകൾ വരുന്നത്. അതുപോലെ സിമ്രാൻ, സാമന്ത, ബോബി ഡിയോൾ, പൂജ ഹെഗ്‌ഡെ എന്നിവരുടെ പേരുകളും ഈ ചിത്രത്തിന്റെ താരനിരയുമായി ബന്ധപ്പെടുത്തി പ്രചരിക്കുന്നുണ്ട്. ജില്ല എന്ന ചിത്രത്തിൽ ഒരുമിച്ചഭിനയിച്ച മോഹൻലാൽ- വിജയ് ടീം പതിനൊന്ന് വർഷത്തിന് ശേഷം ഒന്നിക്കുന്ന ചിത്രമാകും ഇതെന്നാണ് തമിഴ് മാധ്യമങ്ങൾ റിപ്പോർട്ട് ചെയ്യുന്നത്.

ലോകേഷ് ഒരുക്കിയ മാസ്റ്ററിന് ശേഷം വിജയ് സേതുപതി വിജയ്‌ക്കൊപ്പം അഭിനയിക്കുന്ന ചിത്രവുമായിരിക്കും ദളപതി 69 എന്നും പറയപ്പെടുന്നു. അതുപോലെ വിജയ്‌യുടെ ഇതുവരെയുള്ള കരിയറിലെ ഏറ്റവും വലിയ ചിത്രമായിരിക്കും ഇതെന്നും റിപ്പോർട്ടുകളുണ്ട്. ഇത്തരം വാർത്തകൾ പ്രചരിക്കുന്നത്കൊണ്ട് തന്നെ ചിത്രത്തിന്റെ ഔദ്യഗിക പ്രഖ്യാപനത്തിനായി കാത്തിരിക്കുകയാണ് ആരാധകർ. അനിരുദ്ധ് രവിചന്ദർ ആയിരിക്കും ഈ ചിത്രത്തിന് ഈണം പകരുക.