കായംകുളം കൊച്ചുണ്ണിയുടെ ട്രൈലർ പ്രകാശനം ചെയ്യാൻ ഇന്ത്യൻ സിനിമയുടെ ഇതിഹാസങ്ങളായ കമൽ ഹാസനും മോഹൻലാലും…

സിനിമ പ്രേമികൾ ഈ വർഷം ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ‘കായംകുളം കൊച്ചുണ്ണി’. നിവിൻ പോളിയെ നായകനാക്കി റോഷൻ ആൻഡ്രൂസ് സംവിധാനം ചെയ്യുന്ന ചിത്രം ഷൂട്ടിംഗ് പൂർത്തിയാക്കി. ഗ്രാഫിക്സ് വർക്കുകൾ മാത്രം ബാക്കി നിൽക്കുന്ന ചിത്രം അണിയറയിൽ റീലീസിനായി ഒരുങ്ങുകയാണ്. ബോബി- സഞ്ജയാണ് ചിത്രത്തിന് വേണ്ടി തിരക്കഥ ഒരുക്കിയിരിക്കുന്നത്. പ്രിയ ആനന്ദാണ് നായിക വേഷം കൈകാര്യം ചെയ്യുന്നത്. ‘കായംകുളം കൊച്ചുണ്ണി’ യുടെ പ്രധാന ആകർഷണം മോഹൻലാൽ തന്നെയാണ്. ഇത്തിക്കരപക്കിയായി രണ്ടാം പകുതിയിൽ പ്രധാന വേഷത്തിൽ താരം പ്രത്യക്ഷപ്പെടുന്നുണ്ട്. ചിത്രത്തിൽ അതിഥി വേഷം എന്ന നിലയിൽ ആയിരുന്നു മോഹൻലാലിനെ സമീപിച്ചത്,എന്നാൽ മോഹൻലാലിന്റെ ഷൂട്ടിംഗ് സ്റ്റില്ലുകൾ സമൂഹ മാധ്യമങ്ങളിൽ വലിയ തരംഗം സൃഷ്ട്ടിച്ചു എന്നാൽ അതിനു ശേഷം ഇത്തിക്കര പക്കി എന്ന കഥാപാത്രത്തിന് ചിത്രത്തിൽ വലിയ പ്രാധാന്യം തന്നെ നൽകിയിരിക്കുകയാണ് എന്നാണ് അടുത്ത റിപ്പോർട്ടുകൾ സൂചിപ്പിക്കുന്നത്. ഗോകുലം ഫിലിംസിന്റെ ബാനറിൽ ഗോകുലം ഗോപാലനാണ് ചിത്രം നിർമ്മിക്കുന്നത്.

‘കായംകുളം കൊച്ചുണ്ണി’ എന്ന ചിത്രത്തിന്റെ പ്രതീക്ഷകൾ വാനോളം ഉയർത്താൻ അടുത്ത മാസം 9ആം തീയതി ചിത്രത്തിന്റെ ട്രൈലർ പുറത്തിറങ്ങും. ഇന്ത്യൻ സിനിമയുടെ തന്നെ ഇതിഹാസങ്ങളായ കമൽ ഹാസനും മോഹൻലാലും ചേർന്നാണ് ട്രെയ്‌ലർ പ്രകാശനം ചെയ്യുന്നത്. എറണാകുളം ഗോകുലം പാർക്കിൽ വലിയ ജനാവലിയുടെ സാന്നിധ്യത്തിൽ വൻ ആഘോഷത്തോട് കൂടിയായിരിക്കും ട്രെയ്‌ലർ ലോഞ്ച് നടത്തുക. താരങ്ങളുടെ എല്ലാം ഡബ്ബിങ് പൂർത്തിയാക്കിയ ചിത്രം ഗ്രാഫിക്സ് വർക്ക് കൂടി വരും ദിവസങ്ങളിൽ പൂർത്തിയാക്കും. ഓഗസ്റ്റ് 18ന് റിലീസിന് ഒരുങ്ങുന്ന ചിത്രം 300 ഓളം തീയറ്ററുകളിൽ കേരളത്തിൽ മാത്രം റീലീസ് ചെയ്യും. ‘കായംകുളം കൊച്ചുണ്ണി’ ക്ക് വേണ്ടി സംഗീതം ഒരുക്കുന്നത് ഗോപി സുന്ദറാണ്. കമ്മാരസംഭവം എന്ന ദിലീപ് ചിത്രത്തിന് ശേഷം ഗോകുലം ഗോപാലൻ നിർമ്മിക്കുന്ന ചിത്രം കൂടിയാണിത്.