ന്യൂജനറേഷനൊപ്പം കൈകോർത്ത് മോഹൻലാലും; മോഹൻലാൽ 353 പ്രഖ്യാപിച്ചു

കംപ്ലീറ്റ് ആക്ടർ മോഹൻലാൽ നായകനായി ഒരുപിടി വലിയ ചിത്രങ്ങളാണ് അണിയറയിൽ ഒരുങ്ങുന്നത്. മോഹൻലാൽ തന്നെ സംവിധാനം ചെയ്ത് അഭിനയിക്കുന്ന ത്രീഡി ഫാന്റസി ചിത്രം ബറോസ്, ജീത്തു ജോസഫ് ഒരുക്കുന്ന റാം, വൈശാഖ് ഒരുക്കിയ മോൻസ്റ്റർ, ഷാജി കൈലാസ് ഒരുക്കിയ എലോൺ, പൃഥ്വിരാജ് സംവിധാനം ചെയ്യാൻ പോകുന്ന എംപുരാൻ എന്നിവയൊക്കെ മോഹൻലാൽ കമ്മിറ്റ് ചെയ്ത ചിത്രങ്ങളാണ്. ഇപ്പോഴിതാ ഒരു ന്യൂ ജനറേഷൻ സംവിധായകനൊപ്പം കൈകോർത്തിരിക്കുകയാണ് മോഹൻലാൽ. അതിരൻ എന്ന ഫഹദ് ഫാസിൽ- സായ് പല്ലവി ചിത്രത്തിലൂടെ ശ്രദ്ധ നേടിയ വിവേക് ആണ് മോഹൻലാൽ നായകനാവുന്ന 353 ആം ചിത്രം സംവിധാനം ചെയ്യുന്നത്. മോഹൻലാൽ തന്നെയാണ് ഈ ചിത്രം ഇന്ന് തന്റെ സോഷ്യൽ മീഡിയ പേജിലൂടെ പ്രഖ്യാപിച്ചത്.

സോഷ്യൽ മീഡിയയിൽ അദ്ദേഹം കുറിച്ച വാക്കുകൾ ഇങ്ങനെ, “ശ്രീ ഷിബു ബേബി ജോണുമായി മൂന്നരപ്പതിറ്റാണ്ടിൻ്റെ സ്നേഹബന്ധമാണ്. ആ സൗഹൃദം ഇപ്പോൾ ഒരു സംയുക്ത സംരഭത്തിലേക്ക് കടക്കുന്ന വിവരം സന്തോഷത്തോടെ പങ്കുവെക്കട്ടെ. അദ്ദേഹത്തിൻ്റെ പുതിയ സിനിമ നിർമ്മാണ കമ്പനിയായ ജോൺ ആൻഡ് മേരി ക്രിയേറ്റീവും ശ്രീ സെഞ്ച്വറി കൊച്ചുമോൻ്റെ സെഞ്ച്വറി ഫിലിംസും, ശ്രീ കെ. സി ബാബു പങ്കാളിയായ മാക്സ് ലാബും സംയുക്തമായി നിർമ്മിക്കുന്ന ചിത്രത്തിൽ നായകനായി ഞാൻ എത്തുകയാണ്. യുവസംവിധായകനായ ശ്രീ വിവേക് ആണ് ഈ ചിത്രം ഒരുക്കുന്നത്. ശ്രീ ജിത്തു ജോസഫിൻ്റെ റാം എന്ന ചിത്രം പൂർത്തിയായതിനുശേഷം ഇതിൽ പങ്കുചേരും. സിനിമയുടെ കൂടുതൽ വിവരങ്ങൾ ഉടൻ തന്നെ നിങ്ങളുമായി പങ്കുവെക്കുന്നതാണ്..”. ഇത് കൂടാതെ പ്രിയദർശൻ ഒരുക്കുന്ന എം ടി ചിത്രം ഓളവും തീരവും കൂടി മോഹൻലാൽ ചെയ്യാൻ പോകുന്ന ചിത്രമാണ്.