നെറ്റ്ഫ്ലിക്സിലെ ഏറ്റവും മികച്ച പ്രാദേശിക ഭാഷാ ചിത്രം; വീണ്ടും തിളങ്ങി മിന്നൽ മുരളി..!

യുവ താരം ടോവിനോ തോമസിനെ നായകനാക്കി ബേസിൽ ജോസെഫ് ഒരുക്കിയ സൂപ്പർ ഹീറോ ചിത്രമാണ് മിന്നൽ മുരളി. നേരിട്ടുള്ള ഒടിടി റിലീസായി നെറ്റ് ഫ്ലിക്സിൽ റിലീസ് ചെയ്ത ഈ ചിത്രം വലിയ പ്രേക്ഷക പ്രശംസയാണ് നേടിയത്. നിരൂപകരും അഭിനന്ദിച്ച ഈ ചിത്രം ലക്ഷകണക്കിന് കാഴ്ചക്കാരെയാണ് നേടിയെടുത്തത്. പാൻ ഇന്ത്യ തലത്തിലും ആഗോള തലത്തിലും വരെ ശ്രദ്ധിക്കപ്പെട്ട ഈ ചിത്രം വലിയ ചർച്ചയായി മാറുകയും ചെയ്തു. ഇപ്പോഴിതാ, കഴിഞ്ഞ വര്ഷം നെറ്റ്ഫ്ലിക്സിൽ റിലീസ് ചെയ്ത ഏറ്റവും മികച്ച ഇന്ത്യൻ പ്രാദേശിക ഭാഷാ ചിത്രമായി മിന്നൽ മുരളിയെ തിരഞ്ഞെടുത്തിരിക്കുകയാണ്. സംവിധായകൻ ബേസിൽ ജോസെഫ് തന്നെയാണ് ഈ വിവരം പ്രേക്ഷകരുമായി തന്റെ ഇൻസ്റ്റാഗ്രാം സ്റ്റോറിയിലൂടെ പങ്കുവെച്ചത്. ഹിന്ദി ഒഴിച്ചുള്ള ഭാഷകളിലെ ചിത്രങ്ങളുടെ കൂട്ടത്തിലാണ് മിന്നൽ മുരളി ഒന്നാമതെത്തിയത്.

മലയാളത്തിൽ നിന്നുള്ള ആദ്യത്തെ സൂപ്പർ ഹീറോ ചിതമാണ് മിന്നൽ മുരളി. ഈ ചിത്രത്തിന് ഒരു രണ്ടാം ഭാഗം ഉണ്ടാകുമെന്നും ബേസിൽ ജോസെഫ് വെളിപ്പെടുത്തിയിരുന്നു. ടോവിനോ തോമസിന്റെ നായക കഥാപാത്രത്തിനൊപ്പമോ അതിനു മുകളിലോ ശ്രദ്ധ നേടിയ പ്രകടനമാണ് ഈ ചിത്രത്തിലെ വില്ലൻ വേഷം ചെയ്ത ഗുരു സോമസുന്ദരം നടത്തിയത്. ഇവർക്കൊപ്പം വലിയ താരനിരയാണ് ഈ ചിത്രത്തിലണിനിരന്നത്. ബാലതാരം വശിഷ്ട് ഉമേഷ്, ബൈജു, പി ബാലചന്ദ്രൻ, ഹരിശ്രീ അശോകൻ, അജു വർഗീസ്, ഫെമിന ജോർജ്, മാമുക്കോയ, ബിജു കുട്ടൻ, ജൂഡ് ആന്റണി ജോസെഫ് എന്നിവരാണ് ഇതിലെ മറ്റു താരങ്ങൾ. അരുൺ അനിരുദ്ധൻ, ജസ്റ്റിൻ മാത്യു എന്നിവർ ചേർന്ന് രചിച്ച ഈ ചിത്രം നിർമ്മിച്ചത് വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോൾ ആണ്.