കുള്ളനായി മെഗാസ്റ്റാർ എത്തുന്നു..!!

വേഷ പകർച്ചകളിലൂടെ ഞെട്ടിക്കാറുള്ള മെഗാസ്റ്റാർ മമ്മൂട്ടി തന്റെ അഭിനയ ജീവിതത്തിലെ പുതിയ ഒരു പരീക്ഷണത്തിന് ഒരുങ്ങുകയാണ്. തന്റെ സിനിമാ ജീവിതത്തിൽ ആദ്യമായി ഒരു കുള്ളന്റെ വേഷം ചെയ്യാൻ ഒരുങ്ങുകയാണ് മമ്മൂട്ടി. പ്രശസ്ത നടനായ സോഹൻ സീനുലാൽ ആണ് ഈ ചിത്രം സംവിധാനം ചെയ്യാൻ പോകുന്നത്. ഡബിൾ‍സ്‌ എന്ന മമ്മൂട്ടി ചിത്രമൊരുക്കി ഏഴു വർഷം മുൻപാണ് സോഹൻ സീനുലാൽ സംവിധായകനായി അരങ്ങേറിയത്. ബോക്സ് ഓഫീസിൽ ശ്രദ്ധിക്കപ്പെടാതെ പോയ ആ ചിത്രത്തിൽ മമ്മൂട്ടി , നാദിയ മൊയ്‌ദു എന്നിവരാണ് പ്രധാന വേഷങ്ങൾ ചെയ്തത്. അതിനു ശേഷം ഒരു നടനെന്ന നിലയിൽ ഒട്ടേറെ ശ്രദ്ധേയ കഥാപാത്രങ്ങൾ മലയാളത്തിൽ ചെയ്ത ആളാണ് സോഹൻ സീനുലാൽ. അതിൽ കൂടുതൽ ചിത്രങ്ങളും മമ്മൂട്ടിക്കൊപ്പം തന്നെ ആയിരുന്നു എന്നതും എടുത്തു പറഞ്ഞേ പറ്റു.

ഈ വരാൻ പോകുന്ന മമ്മൂട്ടി- സോഹൻ സീനുലാൽ ചിത്രത്തിന്റെ തിരക്കഥ എഴുതുന്നത് ടേക്ക് ഓഫ് എന്ന മഹേഷ് നാരായണൻ ചിത്രം രചിച്ചു പ്രശസ്തനായ പി വി ഷാജികുമാർ ആണ്. പ്രേക്ഷക പ്രശംസയും നിരൂപക പ്രശംസയും ഒരുപോലെ ഏറ്റു വാങ്ങിയ ചിത്രമാണ് ടേക്ക് ഓഫ്. മമ്മൂട്ടി- സോഹൻ സീനുലാൽ ചിത്രത്തിന്റെ പേരും മറ്റു വിവരങ്ങളും ഇതുവരെ അണിയറ പ്രവര്‍ത്തകര്‍ പുറത്ത് വിട്ടിട്ടില്ല. പേരന്പ് എന്ന തമിഴ് ചിത്രവും, യാത്ര എന്ന തെലുങ്കു ചിത്രവുമാണ് ഇനി വരാൻ പോകുന്ന മമ്മൂട്ടി ചിത്രങ്ങൾ. ഇത് കൂടാതെ മാമാങ്കം, ഉണ്ട, മധുര രാജ എന്നിവയും അദ്ദേഹത്തിന്റേതായി ഒരുങ്ങുന്ന ചിത്രങ്ങൾ ആണ്. നേരത്തെ നാദിർഷ ഒരുക്കാൻ പോകുന്ന ഒരു ചിത്രത്തിൽ മമ്മൂട്ടി കുള്ളൻ ആയി അഭിനയിക്കും എന്ന് വാർത്തകൾ ഉണ്ടായിരുന്നു. എന്നാൽ ഇതോടെ ആ പ്രൊജക്റ്റ് ഇനി ഉണ്ടാവില്ലെന്ന് ഉറപ്പായി കഴിഞ്ഞു.