മെഗാസ്റ്റാർ 421 ന്റെ പേര് വെളിപ്പെടുത്തി മമ്മൂട്ടി; ഒരുങ്ങുന്നത് വമ്പൻ ത്രില്ലർ

മലയാളത്തിന്റെ മെഗാസ്റ്റാർ മമ്മൂട്ടി ഇപ്പോൾ നായകനായി അഭിനയിച്ചു കൊണ്ടിരിക്കുന്നത് നവാഗതനായ റോബി വർഗീസ് രാജ് സംവിധാനം ചെയ്യുന്ന ചിത്രത്തിലാണ്. ഛായാഗ്രാഹകനായ റോബി വർഗീസ് രാജ് ആദ്യമായി ഒരുക്കുന്ന ഈ ചിത്രം ഒരു വമ്പൻ ത്രില്ലറായാണ് രൂപപ്പെടുത്തുന്നത്. മമ്മൂട്ടി കമ്പനി എന്ന തന്റെ നിർമ്മാണ ബാനറിൽ മമ്മൂട്ടി തന്നെ നിർമ്മിക്കുന്ന ഈ ചിത്രം, ഈ ബാനറിൽ ഇതുവരെ ഒരുക്കിയതിൽ ഏറ്റവും വലിയ ബഡ്ജറ്റ് ഉള്ള ചിത്രമാണെന്ന റിപ്പോർട്ടുകളാണ് വരുന്നത്. ഇപ്പോഴിതാ ഈ ചിത്രത്തിന്റെ ടൈറ്റിൽ എന്താണെന്നു വെളിപ്പെടുത്തിയിരിക്കുകയാണ് മമ്മൂട്ടി. കണ്ണൂർ സ്‌ക്വാഡ് എന്നാണ് ഈ ത്രില്ലർ ചിത്രത്തിന്റെ ടൈറ്റിൽ. മമ്മൂട്ടി ഒരു പോലീസ് ഓഫീസർ ആയി അഭിനയിക്കുന്ന ഈ ചിത്രത്തിന് തിരക്കഥ രചിച്ചത് പ്രശസ്ത നടനായ റോണി ഡേവിഡ് രാജ് ആണ്. അദ്ദേഹം ആദ്യമായി തിരക്കഥ രചിക്കുന്ന ചിത്രം കൂടിയാണ് മമ്മൂട്ടിയുടെ കണ്ണൂർ സ്‌ക്വാഡ്.

അടുത്തിടെ ഒരു തമിഴ് മാധ്യമത്തിന് നൽകിയ അഭിമുഖത്തിലാണ് മമ്മൂട്ടി ഈ ചിത്രത്തിന്റെ പേര് വെളിപ്പെടുത്തിയത്. മമ്മൂട്ടിക്കൊപ്പം സണ്ണി വെയ്ൻ, ഷറഫുദീൻ, അസീസ് നെടുമങ്ങാട്, ഗായത്രി അരുൺ എന്നിവരും വേഷമിടുന്ന ഈ ചിത്രത്തിന് സംഗീതമൊരുക്കുന്നത് സുഷിൻ ശ്യാം ആണ്. ലിജോ ജോസ് പെല്ലിശ്ശേരി ഒരുക്കിയ നൻ പകൽ നേരത്ത് മയക്കം, നിസാം ബഷീർ ഒരുക്കിയ റോഷാക്ക്, ജിയോ ബേബി ഒരുക്കിയ കാതൽ എന്നിവയാണ് മമ്മൂട്ടി കമ്പനി നിർമ്മിച്ച മറ്റ്‌ ചിത്രങ്ങൾ. ഇതിൽ മമ്മൂട്ടി-ജ്യോതിക ടീമൊന്നിച്ച കാതൽ ഇതുവരെ റിലീസ് ചെയ്തിട്ടില്ല. ബി ഉണ്ണികൃഷ്ണൻ ഒരുക്കിയ ക്രിസ്റ്റഫർ, ജിയോ ബേബിയുടെ കാതൽ, തെലുങ്ക് ചിത്രം ഏജന്റ് എന്നിവയാണ് ഇനി റിലീസ് ചെയ്യാനുള്ള മമ്മൂട്ടി ചിത്രങ്ങൾ.