ചുവുപ്പു സാരിയിൽ സുന്ദരിയായി മീനാക്ഷി ദിലീപ്; വൈറലായി പുത്തൻ ചിത്രങ്ങൾ..!

ജനപ്രിയ നായകൻ ദിലീപിന്റെയും മഞ്ജു വാര്യരുടേയും മകൾ മീനാക്ഷി മലയാള സിനിമാ പ്രേക്ഷകർക്കിടയിൽ വലിയ രീതിയിൽ തന്നെ പരിചിതയാണ്. സിനിമയിലൊന്നും അഭിനയിച്ചിട്ടില്ല എങ്കിലും സോഷ്യൽ മീഡിയയിലൂടെ വളരെ ശ്രദ്ധ നേടിയ ആളാണ് ഈ താരപുത്രി. ദിലീപിനും കാവ്യാ മാധവനും അനുജത്തി മഹാലക്ഷ്മിക്കുമൊപ്പമുള്ള മീനാക്ഷിയുടെ ഓരോ ചിത്രങ്ങളും ഞെട്ടിക്കുന്ന തരത്തിലാണ് സോഷ്യൽ മീഡിയയിൽ വൈറലാവാറുള്ളത്. അതുപോലെ മീനാക്ഷിയുടെ നൃത്ത വീഡിയോകളും ശ്രദ്ധ നേടാറുണ്ട്. ഇപ്പോഴിതാ മീനാക്ഷി ഇൻസ്റ്റഗ്രമിലൂടെ പങ്കു വെച്ച തന്റെ പുത്തൻ ചിത്രങ്ങൾ ആണ് സോഷ്യൽ മീഡിയയിൽ സൂപ്പർ ഹിറ്റായി മാറുന്നത്. ചുവന്ന സാരിയുടുത്തുള്ള തന്റെ പുതിയ ചിത്രങ്ങളാണ് മീനാക്ഷി പങ്കു വെച്ചത്. സാരിയുടുത്തു വന്നപ്പോൾ മീനാക്ഷിയെ കാണാൻ അമ്മ മഞ്ജു വാര്യരെ പോലെയുണ്ടെന്നും ആരാധകർ പറയുന്നുണ്ട്.

ചുവന്ന പട്ടുസാരിയിൽ മുടി അഴിച്ചിട്ട ലുക്കിലാണ് താരപുത്രിയെ ഇപ്പോൾ വന്ന ചിത്രങ്ങളിൽ നമ്മുക്ക് കാണാൻ സാധിക്കുക. സിനിമയിൽ നിന്നും മാറി നിൽക്കുന്ന മീനാക്ഷി എംബിബിഎസ് പഠനം പൂർത്തിയാക്കിയ ശേഷം ആ രംഗത്ത് തന്നെ തുടരാനാണ് പ്ലാൻ ചെയ്യുന്നത് എന്നും റിപ്പോർട്ടുകൾ പറയുന്നുണ്ട്. ഇപ്പോൾ ചെന്നൈയിൽ ആണ് മീനാക്ഷി മെഡിസിന് പഠിക്കുന്നത്. സഞ്ജയ് ലീല ബൻസാലി ഒരുക്കിയ പദ്മാവതി എന്ന ചിത്രത്തിലെ നെയ്‌നോവാലെ എന്ന ഗാനത്തിന് മീനാക്ഷി ചുവടു വെച്ച നൃത്ത വീഡിയോ കുറെ നാൾ മുൻപ് സോഷ്യൽ മീഡിയയിൽ സൂപ്പർ ഹിറ്റായി മാറിയിരുന്നു. സംവിധായകനും നടനും ദിലീപിന്റെ അടുത്ത സുഹൃത്തുമായ നാദിർഷായുടെ മകൾ ആയിഷയുടെ വിവാഹ ആഘോഷങ്ങളിൽ മീനാക്ഷി കൂട്ടുകാർക്കൊപ്പം ഡാൻസ് ചെയ്ത വീഡിയോയും അതിനു മുൻപ് കയ്യടി നേടിയിരുന്നു.