തീയേറ്ററുകളിൽ ആവേശത്തിന്റെ കൊടുങ്കാറ്റുയർത്തികൊണ്ടു ഇത്തിക്കര പക്കി അവതരിച്ചു..!

ഇന്നാണ് പ്രേക്ഷകർ ഏറെ കാത്തിരുന്ന കായംകുളം കൊച്ചുണ്ണി എന്ന ബ്രഹ്മാണ്ഡ ചിത്രം കേരളത്തിൽ റിലീസ് ചെയ്തത്. യുവ താരം നിവിൻ പോളി കായംകുളം കൊച്ചുണ്ണി എന്ന ടൈറ്റിൽ വേഷത്തിൽ എത്തിയപ്പോൾ ഇത്തിക്കര പക്കി എന്ന മാസ്സ് ചരിത്ര കഥാപാത്രമായി അതിഥി വേഷത്തിൽ എത്തിയത് മലയാള സിനിമയുടെ ചക്രവർത്തിയായ മോഹൻലാൽ ആണ്. മോഹൻലാൽ അതിഥി വേഷത്തിൽ വന്നതോടെയാണ് ഈ ചിത്രത്തിന്റെ ഹൈപ്പ് നമ്മൾ ഇന്ന് ഈ കാണുന്ന നിലയിൽ എത്തിയത് എന്ന് പറയാം. അതിഥി വേഷത്തിൽ വരുന്ന മോഹൻലാലിനെ കാണാൻ വേണ്ടി മാത്രം കേരളത്തിൽ നൂറിലധികം ഫാൻസ്‌ ഷോകൾ ആണ് മോഹൻലാൽ ആരാധകർ സംഘടിപ്പിച്ചത്. ചിത്രം തുടങ്ങി ഇന്റെർവലിനോട് അടുക്കുമ്പോൾ ആണ് ഇത്തിക്കര പക്കി ആയുള്ള മോഹൻലാലിന്റെ മാസ്സ് എൻട്രി.

തീയേറ്ററുകളിൽ അക്ഷരാർത്ഥത്തിൽ ആവേശത്തിന്റെ കൊടുങ്കാറ്റു ഉയർത്തിക്കൊണ്ടാണ് മോഹൻലാലിന്റെ വരവ് എന്ന് പറയാം. ആരാധകരും സിനിമാ പ്രേമികളും ആവേശം കൊണ്ട് ആർപ്പു വിളിച്ചും കയ്യടിച്ചും മോഹൻലാലിന്റെ വരവ് മതിമറന്നു ആഘോഷിക്കുകയാണ്. കായംകുളം കൊച്ചുണ്ണി എന്ന ചിത്രത്തെ പ്രേക്ഷകർ ഇരു കയ്യും നീട്ടി സ്വീകരിക്കുന്നതിന്റെ സൂചനയാണ് ഇപ്പോൾ നമ്മുക്ക് ലഭിച്ചു കൊണ്ടിരിക്കുന്നത്. റോഷൻ ആൻഡ്രൂസ് സംവിധാനം ചെയ്ത ഈ ചിത്രം രചിച്ചിരിക്കുന്നത് ബോബി- സഞ്ജയ് ടീമും, ഈ ചിത്രം നിർമ്മിച്ചിരിക്കുന്നത് ഗോകുലം ഗോപാലനും ആണ്. നാൽപ്പത്തിയഞ്ച് കോടി രൂപ മുതൽ മുടക്കി എടുത്ത ഈ ചിത്രത്തിൽ സണ്ണി വെയ്ൻ, പ്രിയ ആനന്ദ്, ബാബു ആന്റണി തുടങ്ങിയവരും അഭിനയിക്കുന്നുണ്ട്. ഗോപി സുന്ദർ ഈണം പകര്ന്ന ഗാനങ്ങളും പശ്ചാത്തല സംഗീതവുമുള്ള ഈ ചിത്രത്തിന്റെ അണിയറയിൽ പ്രവർത്തിച്ചിരുന്നത് ബോളിവുഡിൽ നിന്നുള്ളവരാണ്. ആദ്യ ദിനം റെക്കോർഡ് കളക്ഷനും ഷോകളുമാണ് കായംകുളം കൊച്ചുണ്ണി ലക്ഷ്യമിടുന്നത്.