മരണ മാസ്സ് ലുക്കിൽ കോട്ട മധുവായി പൃഥ്വിരാജ് സുകുമാരൻ; സോഷ്യൽ മീഡിയയിൽ ആഘോഷമായി കാപ്പയിലെ ചിത്രങ്ങൾ

സൂപ്പർ വിജയം നേടി മുന്നേറുന്ന കടുവക്കു ശേഷം പൃഥ്വിരാജ് സുകുമാരൻ- ഷാജി കൈലാസ് ടീം ഒന്നിക്കുന്ന ഏറ്റവും പുതിയ ചിത്രമാണ് കാപ്പ. കഴിഞ്ഞ ദിവസം തിരുവനന്തപുരത്ത് ഇതിന്റെ ഷൂട്ടിംഗ് ആരംഭിച്ചു. ഇപ്പോഴിതാ ഈ ചിത്രത്തിലെ പൃഥ്വിരാജ് സുകുമാരന്റെ സ്റ്റില്ലുകളാണ് സോഷ്യൽ മീഡിയയിൽ വൈറലായി മാറുന്നത്. കട്ട താടിയും മീശയുമായി മരണ മാസ്സ് ലുക്കിലാണ് പൃഥ്വിരാജ് ഇതിൽ പ്രത്യക്ഷപ്പെടുന്നത്. സംവിധായകൻ ഷാജി കൈലാസ് തന്നെയാണ് ഈ സ്റ്റില്ലുകൾ പങ്കു വെച്ചത്. തിരുവനന്തപുരം നഗരത്തിലെ അദൃശ്യ അധോലോകത്തിന്റെ കഥ പറയുന്ന, ജി ആർ ഇന്ദുഗോപൻ രചിച്ച ശംഖുമുഖി എന്ന നോവലിനെ അടിസ്ഥാനമാക്കിയാണ് ഈ ചിത്രമൊരുക്കുന്നത്. കോട്ട മധു എന്ന മാസ്സ് കഥാപാത്രമായി പൃഥ്വിരാജ് അഭിനയിക്കുന്ന ഈ ചിത്രത്തിൽ ആസിഫ് അലി, മഞ്ജു വാര്യർ, അന്ന ബെൻ, ദിലീഷ് പോത്തൻ, ജഗദീഷ്, നന്ദു, ഇന്ദ്രൻസ് എന്നിവരും അഭിനയിക്കുന്നുണ്ട്.

മലയാളത്തിലെ ഫെഫ്ക റൈറ്റേഴ്‌സ് യൂണിയന് വേണ്ടി, തിയേറ്റർ ഓഫ് ഡ്രീംസിന്റെ ബാനറിൽ ജിനു അബ്രഹാമിനൊപ്പം ഡോൾവിൻ കുര്യാക്കോസ്, ദിലീഷ് നായർ എന്നിവർ കൂടി നിർമ്മിക്കുന്ന ഈ ചിത്രത്തിന് തിരക്കഥ രചിച്ചത് ജി ആർ ഇന്ദുഗോപനാണ്. ഇതിനു ഒരു രണ്ടാം ഭാഗവും പ്ലാനുണ്ടെന്നു നിർമ്മാതാവായ ജിനു എബ്രഹാം പുറത്ത് വിട്ടിരുന്നു. ജോമോൻ ടി ജോൺ ആണ് ഈ ചിത്രത്തിന് വേണ്ടി കാമറ ചലിപ്പിക്കുന്നത്. ഏകദേശം അറുപതോളം ദിവസമാണ് ഈ ചിത്രത്തിന് വേണ്ടി പൃഥ്വിരാജ് നല്കിയിരിക്കുന്നതെന്നാണ് സൂചന. ഒരു ഡാർക്ക് മാസ്സ് ആക്ഷൻ ചിത്രമായിരിക്കും കാപ്പ എന്നാണ് ഷാജി കൈലാസ് അടുത്തിടെ നടന്ന ഒരു മാധ്യമ അഭിമുഖത്തിൽ വെളിപ്പെടുത്തിയത്.