സോഷ്യൽ മീഡിയയിൽ വീണ്ടും രജനി തരംഗം; ദർബാറിൽ മരണ മാസ്സ് ആയി തലൈവർ..!

സർക്കാർ എന്ന വിജയ് ചിത്രത്തിന് ശേഷം പ്രശസ്ത സംവിധായകൻ എ ആർ മുരുഗദോസ് സംവിധാനം ചെയ്യുന്ന ചിത്രമാണ് ദർബാർ. സൂപ്പർ സ്റ്റാർ രജനികാന്ത് നായകൻ ആയി എത്തുന്ന ഈ ചിത്രത്തിലെ നായികാ വേഷം ചെയ്യുന്നത് നയൻ താര ആണ്. പേട്ട എന്ന കാർത്തിക് സുബ്ബരാജ് ചിത്രത്തിന്റെ വൻ വിജയത്തിന് ശേഷം തലൈവർ രജനികാന്ത് വീണ്ടും മാസ്സ് കഥാപാത്രമായി എത്തുന്ന ചിത്രമാണ് ദർബാർ. ഒരു മാസ്സ് പോലീസ് ഓഫീസർ ആയാണ് രജനികാന്ത് ഈ ചിത്രത്തിൽ അഭിനയിക്കുന്നത്. ഇപ്പോഴിതാ ഈ ചിത്രത്തിലെ രജനികാന്തിന്റെ മാസ്സ് സ്റ്റില്ലുകൾ പുറത്തു വിട്ടിരിക്കുകയാണ് സംവിധായകൻ എ ആർ മുരുഗദോസ്. സൂപ്പർ സ്റ്റാർ രജനികാന്ത് പോലീസ് യൂണിഫോമിൽ ഉള്ളതും അല്ലാത്തതുമായ മാസ്സ് സ്റ്റില്ലുകൾ ആണ് എത്തിയിരിക്കുന്നത്. റിലീസ് ചെയ്തു നിമിഷങ്ങൾക്കകം തന്നെ ഈ സ്റ്റില്ലുകൾ സോഷ്യൽ മീഡിയയിൽ കൊടുങ്കാറ്റായി മാറി കഴിഞ്ഞു.

മുംബൈ പൊലീസിലെ ഒരു ഉദ്യോഗസ്ഥൻ ആയാണ് അദ്ദേഹം എത്തുന്നത് എന്നും അതുപോലെ അദ്ദേഹം ഈ ചിത്രത്തിൽ ഇരട്ട വേഷത്തിൽ ആവും എത്തുകയെന്നുമൊക്കെ സ്ഥിതീകരിക്കാത്ത റിപ്പോർട്ടുകൾ നേരത്തെ വന്നിരുന്നു. ഏതായാലും പോലീസ് ഉദ്യോഗസ്ഥൻ ആയാണ് സൂപ്പർ താരം എത്തുന്നത് എന്നുള്ള കാര്യം വ്യക്തമായി കഴിഞ്ഞു. ലൈക്ക പ്രൊഡക്ഷൻസ് നിർമ്മിക്കുന്ന ഈ ചിത്രത്തിന് കാമറ ചലിപ്പിക്കുന്നത് പ്രശസ്ത സംവിധായകൻ കൂടിയായ സന്തോഷ് ശിവൻ ആണ്. അനിരുദ്ധ് രവിചന്ദർ ആണ് ദർബാറിന്‌ വേണ്ടി സംഗീതം ഒരുക്കുന്നത്. ശ്രീകർ പ്രസാദ് എഡിറ്റ് ചെയ്യുന്ന ഈ ചിത്രം അടുത്ത പൊങ്കലിന് പ്രേക്ഷകർക്ക് മുന്നിൽ എത്തും എന്നാണ് സൂചന.