ഇനി സീനിയേഴ്സിന്റെ കളി; മോഹൻലാൽ- മമ്മൂട്ടി- സുരേഷ് ഗോപി യുഗം തിരിച്ചു വരുന്നു

ഇപ്പോൾ സോഷ്യൽ മീഡിയയിൽ മുഴുവൻ നിറഞ്ഞു നിൽക്കുന്നത് മോഹൻലാൽ, മമ്മൂട്ടി, സുരേഷ് ഗോപി എന്നിവരുടെ കിടിലൻ ആക്ഷൻ രംഗങ്ങളുടെ ചിത്രങ്ങളാണ്. കഴിഞ്ഞ വർഷം ലുസിഫെറിൽ മോഹൻലാലും ഈ വർഷം ഷൈലോക്കിൽ മമ്മൂട്ടിയും അതുപോലെ ഇപ്പോൾ ഷൂട്ടിംഗ് നടക്കുന്ന കാവലിൽ സുരേഷ് ഗോപിയും എതിരാളികളുടെ നെഞ്ചിൽ ചവിട്ടുന്ന മാസ്സ് സ്റ്റില്ലുകൾ സോഷ്യൽ മീഡിയയിൽ വൈറലായതിനു ഒപ്പം ഇവരുടെ പഴയ ചിത്രങ്ങളിലെ ഇത്തരം സ്റ്റില്ലുകളും ശ്രദ്ധ നേടുകയാണ്. നിതിൻ രഞ്ജി പണിക്കർ സംവിധാനം ചെയ്യുന്ന കാവലിലൂടെ ആക്ഷൻ ഹീറോയായി സുരേഷ് ഗോപി ഒന്ന് കൂടി എത്തുകയാണ്. അനൂപ് സത്യൻ ചിത്രം വരനെ ആവശ്യമുണ്ട് സൂപ്പർ വിജയം നേടിയതോടെ വലിയ തിരിച്ചു വരവാണ് സുരേഷ് ഗോപി കാഴ്ച വെച്ചത്. തൊണ്ണൂറുകളിൽ മലയാള സിനിമ ഭരിച്ച മോഹൻലാൽ- മമ്മൂട്ടി- സുരേഷ് ഗോപി ത്രയം ഒരിക്കൽ കൂടി മലയാള സിനിമാ പ്രേമികളുടെ മനസ്സും ചിന്തകളും പ്രതീക്ഷകളും ഭരിക്കുന്ന കാഴ്ചയാണ് കാണാൻ സാധിക്കുന്നത്.

മോഹൻലാലിന്റേതായി സോഷ്യൽ മീഡിയയിൽ പ്രചരിക്കുന്നത് ആര്യൻ, യോദ്ധ, തച്ചോളി വർഗീസ് ചേകവർ, ഒളിമ്പ്യൻ ആന്റണി ആദം, രാവണ പ്രഭു, കായംകുളം കൊച്ചുണ്ണി, ലൂസിഫർ തുടങ്ങിയ ചിത്രങ്ങളിലെ ചില സ്റ്റില്ലുകൾ ആണ്. തന്റേതായ ശൈലിയിൽ ഗംഭീരമായി ആക്ഷൻ ചെയ്യുന്ന മമ്മൂട്ടിയുടേതായി ദി ഗ്രേറ്റ് ഫാദർ, മാസ്റ്റർപീസ്, ഷൈലോക്ക്, പുത്തൻപണം, ഓഗസ്റ്റ് ഒന്ന്, ബെസ്ററ് ആക്ടർ, ഓൾ ദി ബെസ്ററ് തുടങ്ങിയ സിനിമകളിലെ സ്റ്റില്ലുകളാണ് പ്രചരിക്കുന്നത്. ആക്ഷൻ സൂപ്പർ സ്റ്റാർ എന്ന പേരോടെ തന്നെ പോപ്പുലറായ സുരേഷ് ഗോപിയുടെ ഏകലവ്യൻ, രണ്ടാം ഭാവം, കാവൽ എന്ന ചിത്രങ്ങളിലെ സംഘട്ടനത്തിന്റെ സ്റ്റില്ലുകളും തരംഗമാണ്.