ദൃശ്യം 2 നെ കുറിച്ച് ബംഗ്ലാദേശി പോലീസ് സൂപ്രണ്ടിന് പറയാനുള്ളതു..!

മലയാള സിനിമയുടെ മാത്രമല്ല ഇന്ത്യൻ സിനിമയുടെ തന്നെ അഭിമാനമായി മാറുകയാണ് മോഹൻലാൽ- ജീത്തു ജോസഫ് ടീമൊരുക്കിയ ദൃശ്യം 2 എന്ന ചിത്രം. മലയാളത്തിന്റെ അതിർത്തികൾ ഭേദിച്ച് പ്രശംസകൾ ഏറ്റു വാങ്ങിയ ഈ ചിത്രം ലോകം മുഴുവനുമുള്ള സിനിമാ പ്രേമികളെ ഭാഷാ ഭേദമന്യേ അത്ഭുതപ്പെടുത്തുകയാണ്. വിദേശികളായ സിനിമാ ആസ്വാദകർ ഈ ചിത്രത്തേയും ഇതിലെ പ്രകടനത്തിന് മോഹൻലാലിനേയും അഭിനന്ദിക്കുന്ന കാഴ്ച നമ്മൾ ഇപ്പോൾ തന്നെ ഒരുപാട് കണ്ടു കഴിഞ്ഞു. അമേരിക്ക, ഓസ്ട്രേലിയ, ബ്രിട്ടൻ, പാക്കിസ്ഥാൻ, നേപ്പാൾ, സിംഗപ്പൂർ, ശ്രീലങ്ക, അങ്ങനെ ഒട്ടേറെ രാജ്യങ്ങളിൽ നിന്നുള്ള പ്രേക്ഷകർ ദൃശ്യം 2 നു പ്രശംസയുമായി എത്തിയിരുന്നു. ഇപ്പോഴിതാ ബംഗ്ലാദേശിലെ ഒരു പോലീസ് സൂപ്രണ്ട് ആണ് ഈ ചിത്രത്തെക്കുറിച്ചുള്ള അഭിപ്രായം തുറന്നു പറഞ്ഞു മുന്നോട്ടു വന്നിരിക്കുന്നത്, ബംഗ്ലാദേശ് പൊലീസിലെ അഡിഷണൽ സൂപ്രണ്ട് ആയ മഷ്‌റൂഫ് ഹൊസൈൻ ആണ് ദൃശ്യം 2 നെ പ്രശംസിച്ചു കൊണ്ട് തന്റെ ഫേസ്ബുക് അക്കൗണ്ടിലൂടെ എത്തിയിരിക്കുന്നത്.

https://www.facebook.com/mashroof.hossain.3/posts/2884471918496427

ഈ ചിത്രം നിർബന്ധമായും പോലീസ് അക്കാഡമികളിൽ കാണിക്കണമെന്നാണ് അദ്ദേഹം അഭിപ്രായപ്പെടുന്നത്. പോലീസ് ആവാൻ ആഗ്രഹിക്കുന്നവരും ആഗ്രഹിക്കാത്തവരും ഈ ചിത്രം കാണണം എന്നും അദ്ദേഹം പറയുന്നു. ജീത്തു ജോസഫിന്റെ അന്വേഷാത്മകമായ മനസ്സിനേയും അദ്ദേഹം പ്രശംസിക്കുന്നുണ്ട്. എല്ലാവരും തീർച്ചയായും ഈ ചിത്രം കാണണമെന്ന് ആവശ്യപ്പെട്ടു കൊണ്ടാണ് അദ്ദേഹം തന്റെ വാക്കുകൾ അവസാനിപ്പിക്കുന്നത്. മലയാള സിനിമയുടെ ചരിത്രത്തിലെ തന്നെ ഏറ്റവും വലിയ ദേശീയ- അന്തർദേശീയ പ്രശംസ നേടിയ ചിത്രങ്ങളിലൊന്നായി ദൃശ്യം 2 മാറിക്കഴിഞ്ഞു. ഈ ചിത്രം രചിച്ചു സംവിധാനം ചെയ്ത ജീത്തു ജോസഫിനും ഇതിലെ നായക വേഷം ചെയ്ത മോഹൻലാലിനും അഭൂതപൂർവമായ പ്രേക്ഷക- നിരൂപക പ്രശംസയും കയ്യടിയുമാണ് സോഷ്യൽ മീഡിയയിൽ നിന്ന് ലഭിക്കുന്നത്.