ഉറക്കമിളച്ചിരുന്ന് നാട്ടുകാരുടെ വസ്ത്രങ്ങൾ തയ്ച്ചു വളർത്തി വലുതാക്കിയ അമ്മ; മാതൃദിനത്തിൽ കയ്യടി നേടി മറീനയും അമ്മയും

മലയാള സിനിമയുടെ പുതു തലമുറയിലെ നടിമാരിൽ ഏറെ ശ്രദ്ധ നേടിയിട്ടുള്ള ഒരാളാണ് മറീന മൈക്കൽ. ചെറുതും വലുതുമായ വേഷങ്ങളിലൂടെ പ്രേക്ഷകരുടെ മനസ്സിൽ ഇടം നേടിയ ഈ കലാകാരി മാതൃദിനത്തിൽ ഇട്ട സോഷ്യൽ മീഡിയ പോസ്റ്റ് ആണ് ഇപ്പോൾ ഏവരുടെയും കയ്യടി നേടുന്നത്. മറീനയുടെ ഓൺസ്‌ക്രീൻ വേഷങ്ങൾ തരുന്ന ഇമേജ് മറീന ഒരു സമ്പന്ന കുടുംബത്തിലെ തന്റേടിയായ പെൺകുട്ടിതയുടേത് ആണെങ്കിലും വളരെ സാധാരണമായ ഒരു കുടുംബത്തിൽ ജനിച്ചു വളർന്ന ആളാണ് മറീന. താനൊരു തയ്യൽക്കാരിയുടെ മകൾ ആണെന്നാണ് തന്റെ പുതിയ സോഷ്യൽ മീഡിയ പോസ്റ്റിലൂടെ മറീന തുറന്നു പറയുന്നത്. മാതൃദിനത്തിൽ ഇൻസ്റ്റാഗ്രാമിൽ ഇട്ട പോസ്റ്റിലൂടെ ആണ് മറീനയുടെ ഈ തുറന്നു പറച്ചിൽ. ഇൻസ്റ്റാഗ്രാമിൽ തന്റെ അമ്മയുടെ ഒപ്പം ഉള്ള ഒരു ഫോട്ടോയും മറീന ഷെയർ ചെയ്തിട്ടുണ്ട്.

തനിക്കു പണി കുറഞ്ഞു തുടങ്ങിയപ്പോൾ തന്റെ അമ്മക്ക് വീണ്ടും പണി ആയി എന്ന് പറയുന്നു മറീന. അമ്മയുടെ പുതിയ തയ്യൽ കട തുടങ്ങുകയാണ് എന്നും മറീന ആ പോസ്റ്റിൽ പറയുന്നു. എല്ലാവരുടെയും പ്രാർഥന വേണം എന്നും ഈ നടി പറയുന്നു. രാത്രി ഉറക്കമിളച്ചിരുന്ന് തയ്യൽ ജോലികൾ ചെയ്താണ് ‘അമ്മ തന്നെ വളർത്തിയത് എന്ന് അഭിമാനത്തോടെ പറയുന്ന മറീന, തോറ്റു പോയാലും അഭിമാനം നഷ്ടപ്പെടുത്തരുത് എന്നാണ് തന്റെ ‘അമ്മ തന്നെ പഠിപ്പിച്ചിരിക്കുന്നതും എന്നും പറഞ്ഞു. എല്ലാ പെൺകുട്ടികളും ഇതുപോലൊരു അമ്മയെ അർഹിക്കുന്നുണ്ട് എന്നും ‘അമ്മ ഒരു പോരാളിയാണ് എന്നും പറഞ്ഞാണ് മറീന തന്റെ ഇൻസ്റ്റാഗ്രാം പോസ്റ്റ് അവസാനിപ്പിക്കുന്നത്. നിരവധി ആരാധകർ മറീനയെ അഭിനന്ദിച്ചു ഈ പോസ്റ്റിനു താഴെ എത്തുന്നുണ്ട്.