അവാർഡുകൾ വാരി കൂട്ടി മരക്കാർ അറബിക്കടലിന്റെ സിംഹം; ഇന്ത്യയിലെ ഏറ്റവും മികച്ച ചിത്രത്തിനുള്ള അവാർഡ് വീണ്ടും മലയാളത്തിലേക്ക്..!

കംപ്ലീറ്റ് ആക്ടർ മോഹൻലാലിനെ നായകനാക്കി പ്രിയദർശൻ സംവിധാനം ചെയ്ത മരക്കാർ അറബിക്കടലിന്റെ സിംഹം എന്ന ചിത്രം സംസ്ഥാന അവാർഡുകൾക്ക് പുറമെ ഇപ്പോൾ ദേശീയ പുരസ്കാരങ്ങളും വാരി കൂട്ടി മലയാള സിനിമക്ക് അഭിമാനമായി മാറിയിരിക്കുകയാണ്. അറുപതിയേഴാമത് ദേശീയ ചലച്ചിത്ര പുരസ്‌കാരങ്ങൾ പ്രഖ്യാപിച്ചപ്പോൾ ഇന്ത്യയിലെ ഏറ്റവും മികച്ച ചിത്രമായി തിരഞ്ഞെടുക്കപ്പെട്ടത് മരക്കാർ ആണ്. ഇതിനോടൊപ്പം മികച്ച വി എഫ് എക്സിനുള്ള അവാർഡ് ഈ ചിത്രത്തിലൂടെ പ്രിയദർശന്റെ മകൻ സിദ്ധാർത്ഥ് പ്രിയദർശൻ നേടിയപ്പോൾ മികച്ച വസ്ത്രാലങ്കാരത്തിനുള്ള പുരസ്‌കാരം നേടിയത് ഇതിലെ മനോഹരമായ വസ്ത്രങ്ങൾ ഒരുക്കിയ സുജിത് സുധാകരൻ, വി സായ് എന്നിവരാണ്. 12 മത്തെ തവണയാണ് 67 വർഷത്തെ ചരിത്രത്തിൽ ഒരു മലയാളം ചിത്രം ഇന്ത്യയിലെ ഏറ്റവും മികച്ച ചിത്രമായി മാറിയിരിക്കുന്നത്.

സംസ്ഥാന അവാർഡിൽ മികച്ച വി എഫ് എക്‌സ്, നൃത്ത സംവിധാനം, ഡബ്ബിങ് എന്നീ മൂന്നു അവാർഡുകളാണ് മരക്കാർ നേടിയത്. ഈ ചിത്രത്തിലെ ഗംഭീര പ്രകടനത്തിന് മോഹൻലാൽ അവസാന നിമിഷം വരെ ദേശീയ തലത്തിൽ മികച്ച നടനുള്ള മത്സരത്തിന് ഉണ്ടായിരുന്നു എന്നും റിപ്പോർട്ടുകൾ വരുന്നുണ്ട്. മലയാളത്തിലെ എക്കാലത്തെയും ഏറ്റവും വലിയ ചിത്രമായ മരക്കാർ കോവിഡ് പ്രതിസന്ധി കൊണ്ടുള്ള പ്രശ്നങ്ങൾ നീങ്ങിയാൽ ഈ വർഷം മേയ് 13 നു ലോകം മുഴുവനും റിലീസ് ചെയ്യും. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് ഈ ചിത്രം നിർമ്മിച്ചിരിക്കുന്നത്. മലയാളം, തമിഴ്, ഹിന്ദി, കന്നഡ, തെലുങ്ക് തുടങ്ങിയ അഞ്ചു ഭാഷകളിൽ ആണ് മരക്കാർ റിലീസ് ചെയ്യാൻ പോകുന്നത്. മലയാള സിനിമയിലെ ഏറ്റവും വലിയ മ്യൂസിക് റൈറ്റ്‌സ്, ഓവർസീസ് റൈറ്റ്‌സ്, സാറ്റലൈറ്റ് റൈറ്റ്‌സ്, ഡിജിറ്റൽ റൈറ്റ്‌സ് എന്നിവയെല്ലാം നേടിയ ചിത്രം കൂടിയാണ് മരക്കാർ.