മരക്കാറിൽ ഒരുങ്ങുന്നത് ഹോളിവുഡ് ചിത്രങ്ങളെ അനുസ്മരിപ്പിക്കുന്ന ആക്ഷൻ രംഗങ്ങൾ; ലൊക്കേഷൻ ചിത്രങ്ങൾ വൈറൽ ആവുന്നു..!

താര ചക്രവർത്തി മോഹൻലാലിനെ നായകനാക്കി മാസ്റ്റർ ഡയറക്ടർ പ്രിയദർശൻ ഒരുക്കുന്ന ബ്രഹ്മാണ്ഡ ചിത്രമാണ് മരക്കാർ; അറബിക്കടലിന്റെ സിംഹം. ഇപ്പോൾ ഹൈദരാബാദ് രാമോജി റാവു ഫിലിം സിറ്റിയിലെ കൂറ്റൻ സെറ്റിൽ ഈ ചിത്രത്തിന്റെ ചിത്രീകരണം പുരോഗമിച്ചു കൊണ്ടിരിക്കുകയാണ്. ഹോളിവുഡ് ചിത്രങ്ങളെ അനുസ്മരിപ്പിക്കുന്ന ആക്ഷൻ രംഗങ്ങൾ ആണ് ഈ ചിത്രത്തിൽ ഉണ്ടാവുക എന്ന സൂചനയാണ് ഇതിന്റെ ലൊക്കേഷൻ ചിത്രങ്ങൾ നമ്മുക്ക് തരുന്നത്. ആ ലൊക്കേഷൻ ചിത്രങ്ങൾ ഇതിനോടകം സോഷ്യൽ  മീഡിയയിൽ വൈറൽ ആയി കഴിഞ്ഞു. സാബു സിറിൽ ഒരുക്കിയ ഗംഭീര സെറ്റുകൾ ആണ് ഈ ചിത്രത്തിന്റെ മറ്റൊരു പ്രത്യേകത. തിരു കാമറ ചലിപ്പിക്കുന്ന ഈ ചിത്രത്തിന് വേണ്ടി സംഗീതം ഒരുക്കുന്നത് റോണി റാഫേൽ ആണ്.

നൂറു കോടി രൂപ ബഡ്ജറ്റിൽ ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ, കോൺഫിഡന്റ് ഗ്രൂപ്പിന്റെ ബാനറിൽ ഡോക്ടർ സി ജെ റോയ്, മൂൺ ഷോട്ട് എന്റെർറ്റൈന്മെന്റിന്റെ ബാനറിൽ സന്തോഷ് ടി കുരുവിള എന്നിവർ ചേർന്നാണ് ഈ ചിത്രം നിർമ്മിക്കുന്നത്. മോഹൻലാലിന് ഒപ്പം അർജുൻ, സുനിൽ ഷെട്ടി, പ്രണവ് മോഹൻലാൽ, പ്രഭു, മുകേഷ്, സിദ്ദിഖ്, മഞ്ജു വാര്യർ, കല്യാണി പ്രിയദർശൻ, കീർത്തി സുരേഷ്, പൂജ കുമാർ, നെടുമുടി വേണു, ബാബുരാജ്, മാമുക്കോയ, ഗണേഷ് കുമാർ തുടങ്ങി ഒട്ടേറെ താരങ്ങൾ ഈ ചിത്രത്തിന്റെ താര നിരയുടെ ഭാഗം ആണ്. കന്നഡ സൂപ്പർ താരം കിച്ച സുദീപും ഈ ചിത്രത്തിൽ ഒരു വേഷം ചെയ്യുന്നുണ്ട് എന്ന് റിപ്പോർട്ടുകൾ വന്നിരുന്നു. മലയാള സിനിമയിലെ എക്കാലത്തേയും വലിയ പ്രൊജക്റ്റ് ആയാണ് ഈ ചിത്രം ഒരുക്കുന്നത്.