ഒറ്റിറ്റിക്കൊപ്പം തീയേറ്ററിലും റിലീസ് ചെയ്യാൻ മരക്കാർ; ചിത്രം കളിയ്ക്കാൻ തയ്യാർ എന്നറിയിച്ചു നൂറിലധികം തീയേറ്ററുകൾ..!

മോഹൻലാൽ നായകനായ പ്രിയദർശൻ ചിത്രം വീണ്ടും വാർത്തകളിൽ നിറഞ്ഞു നിൽക്കുകയാണ്. മലയാള സിനിമയിലെ ഏറ്റവും വലിയ ചിത്രമായ മരക്കാർ ഏകദേശം എൺപതു കോടി മുതൽ മുടക്കിലാണ് നിർമ്മിച്ചത്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ഈ ചിത്രം ഇന്ത്യയിലെ മികച്ച ചിത്രത്തിനുള്ള ദേശീയ പുരസ്‍കാരവും നേടിയെടുത്തിരുന്നു. ദേശീയ- സംസ്ഥാന ചലച്ചിത്ര അവാർഡിൽ ആറോളം പുരസ്‍കാരങ്ങൾ നേടിയ ഈ ചിത്രം കോവിഡ് പ്രതിസന്ധിയെ തുടർന്ന് രണ്ടു വർഷത്തോളമായി തീയേറ്റർ റിലീസ് സാധിക്കാതെ ഹോൾഡ് ചെയ്തു വെച്ചിരിക്കുകയായിരുന്നു നിർമ്മാതാവ്. എന്നാൽ ഇപ്പോൾ വീണ്ടും തീയേറ്ററുകൾ തുറന്നതോടെ ചിത്രം റിലീസ് ചെയ്യാൻ അവർ ശ്രമിച്ചെങ്കിലും കേരളത്തിലെ തീയേറ്റർ സംഘടനയായ ഫിയോക്കിന്റെ കടുംപിടുത്തവും വാശിയും മൂലം ഈ ചിത്രത്തിന് തീയേറ്റർ റിലീസ് സാധ്യമല്ലാത്ത അവസ്ഥയാണ് വന്നിരിക്കുന്നത് എന്ന് നിർമ്മാതാവ് പ്രസ്സ് മീറ്റിൽ അറിയിച്ചിരുന്നു. അത്കൊണ്ട് തന്നെ മരക്കാർ ഒറ്റിറ്റി റിലീസിന് തീരുമാനിച്ചു എന്ന് നിർമ്മാതാവ് അറിയിക്കുകയും ചെയ്തു.

എന്നാൽ ഇപ്പോഴിതാ, ഈ ചിത്രം കാണാൻ കാത്തിരിക്കുന്ന ആരാധകർ, സിനിമാ പ്രേമികൾ, സിനിമാ പ്രവർത്തകർ എന്നിവരുടേയും കേരളത്തിലെ ഒരു വിഭാഗം തീയേറ്ററുകളുടെ ആവശ്യവും കണക്കിലെടുത്തു മരക്കാർ ഒറ്റിറ്റി പ്ലാറ്റ്‌ഫോമിലും തീയേറ്ററിലും ഒരേ സമയം റിലീസ് ചെയ്യാൻ കഴിയുമോ എന്ന ചർച്ചകൾ നടക്കുകയാണ്. ആമസോൺ പ്രൈം ആണ് ഈ ചിത്രം സ്ട്രീം ചെയ്യാൻ പോകുന്നത് എന്നാണ് സൂചന. അവർ സമ്മതിച്ചാൽ പത്തു ദിവസത്തേക്ക് മരക്കാർ കേരളത്തിലെ നൂറിലധികം സ്‌ക്രീനുകളിൽ റിലീസ് ചെയ്യാൻ ആണ് ആലോചന. ഒറ്റിറ്റി റിലീസ് ചെയ്താൽ മരക്കാർ തീയേറ്ററുകളിൽ കളിപ്പിക്കാൻ തയ്യാറല്ല എന്ന് ഫിയോക് പറയുന്നുണ്ട് എങ്കിലും, കേരളത്തിലെ നൂറിൽ കൂടുതൽ സ്ക്രീനുകൾ തങ്ങൾ അതിനു തയ്യാറാണ് എന്ന നിലപാടിൽ ആണ്. യാതൊരു വിധ കണ്ടീഷനുകളും ഇല്ലാതെ ആണ് ഈ ചിത്രം തീയേറ്ററുകൾക്കു കൊടുക്കുക എന്നും നിർമ്മാതാവ് അറിയിച്ചിട്ടുണ്ട്. അന്തിമ തീരുമാനം ആമസോൺ പ്രൈം ആയുള്ള വ്യവസ്ഥകൾ പോലെ ഇരിക്കുമെന്നാണ് സൂചന.