മരക്കാർ പുതിയ റിലീസ് ഡേറ്റ് പ്രഖ്യാപിച്ചു നിർമ്മാതാവ്; ചിത്രം തീയേറ്റേറ്റിൽ തന്നെ റിലീസ് ചെയ്യും..!

കംപ്ലീറ്റ് ആക്ടർ മോഹൻലാലിനെ നായകനാക്കി പ്രിയദർശൻ ഒരുക്കിയ മരക്കാർ അറബിക്കടലിന്റെ സിംഹം എന്ന ബ്രഹ്മാണ്ഡ ചിത്രത്തിന്റെ റിലീസ് വീണ്ടും മാറ്റി. കോവിഡ് രണ്ടാം തരംഗമാണ് ഇക്കുറി ഈ ചിത്രത്തെ ചതിച്ചതു. കഴിഞ്ഞ വർഷം മാർച്ചിൽ റിലീസ് ചെയ്യേണ്ട മരക്കാർ കോവിഡ് പ്രതിസന്ധി മൂലം ഈ വർഷം മാർച്ചിലേക്കു മാറ്റിയിരുന്നു. പിന്നീട് ഈ വർഷം മെയ് പതിമൂന്നിലേക്കും റിലീസ് ഡേറ്റ് മാറ്റിയെങ്കിലും കോവിഡ് തരംഗം ആഞ്ഞടിച്ചതോടെ വീണ്ടും റിലീസ് മാറ്റുകയല്ലാതെ വഴിയില്ലാത്ത അവസ്ഥയിലായി നിർമ്മാതാവ് ആന്റണി പെരുമ്പാവൂർ. 85 കോടിയോളം രൂപ മുതൽ മുടക്കി നിർമ്മിച്ച ഈ ചിത്രം മലയാള സിനിമയുടെ ചരിത്രത്തിലെ തന്നെ ഏറ്റവും വലിയ ചിത്രമാണ്. ഇന്ത്യയിലെ മികച്ച ചിത്രത്തിനുള്ള ദേശീയ ചലച്ചിത്ര പുരസ്‌കാരം കൂടി ലഭിച്ചതോടെ ഏറെ ആവേശത്തോടെയാണ് പ്രേക്ഷകർ ഈ ചിത്രം കാത്തിരുന്നത്. ഏതായാലും ഈ ചിത്രം തീയേറ്ററുകളിൽ തന്നെ റിലീസ് ചെയ്യുമെന്നും ഇപ്പോഴത്തെ തീരുമാന പ്രകാരം ഈ വർഷം ഓഗസ്റ്റ് 12 നു ഓണം റിലീസ് ആയി മരക്കാർ റിലീസ് ചെയ്യുമെന്നും ആന്റണി പെരുമ്പാവൂർ കഴിഞ്ഞ ദിവസം മാധ്യമങ്ങളെ അറിയിച്ചു.

ഓഗസ്റ്റ് 12 നു നേരത്തെ റിലീസ് പ്രഖ്യാപിച്ചിരുന്ന മറ്റൊരു മോഹൻലാൽ ചിത്രമായ ആറാട്ട്, ഒക്ടോബറിൽ അല്ലെങ്കിൽ നവംബറിൽ പൂജ / ദീപാവലി റിലീസ് ആയി എത്തുമെന്നാണ് ഇപ്പോൾ ലഭിക്കുന്ന റിപ്പോർട്ടുകൾ പറയുന്നത്. അതുപോലെ മോഹൻലാൽ സംവിധാനം ചെയ്യുന്ന ബറോസ് എന്ന ത്രീഡി ചിത്രം ഈ വർഷം ഡിസംബറിൽ റിലീസ് ചെയ്യാനാണ് പ്ലാൻ ചെയ്യുന്നതെന്നും ആന്റണി പെരുമ്പാവൂർ അറിയിച്ചു. ഈ വർഷം റിലീസ് ചെയ്ത ഏക മോഹൻലാൽ ചിത്രം ദൃശ്യം 2 ആണ്. ആഗോള തലത്തിൽ വരെ വമ്പൻ വിജയം നേടിയ ഈ ചിത്രം മലയാള സിനിമയുടെ ചരിത്രത്തിൽ ഏറ്റവും കൂടുതൽ ഡിജിറ്റൽ റൈറ്റ്സ് ലഭിച്ച ചിത്രമാണ്. മുപ്പതു കോടി രൂപയ്ക്കാണ് ഈ ചിത്രം ആമസോൺ പ്രൈം സ്വന്തമാക്കിയത്. ഇതിലെ ഗംഭീര പ്രകടനത്തിന് ഇന്ത്യക്കു അകത്തും നിന്നും പുറത്തു നിന്നും വലിയ പ്രശംസയാണ് മോഹൻലാൽ നേടിയത്.