മനോഹരം നെഞ്ചിലേറ്റിയ പ്രേക്ഷകർക്ക് നന്ദി പറഞ്ഞു നിർമ്മാതാവ്…!

കഴിഞ്ഞ മാസം കേരളത്തിൽ റിലീസ് ചെയ്ത മനോഹരം എന്ന ചിത്രം പേര് പോലെ തന്നെ വളരെ മനോഹരമായ ഒരു ചലച്ചിത്രാനുഭവം ആണ് മലയാളി പ്രേക്ഷകർക്ക് സമ്മാനിച്ചത്. രണ്ടു മണിക്കൂർ സമയം അവരെ ചിരിപ്പിച്ചും ആവേശം കൊള്ളിച്ചും അവരുടെ മനസ്സിൽ തൊടുന്ന മുഹൂർത്തങ്ങൾ നൽകിയും മനോഹരം എന്ന ചിത്രം രസിപ്പിച്ചു. വിനീത് ശ്രീനിവാസൻ നായകനായി എത്തിയ ഈ ചിത്രം രചിച്ചു സംവിധാനം ചെയ്തത് അൻവർ സാദിഖ് ആണ്. ഈ പ്രതിഭയുടെ സംവിധാന മികവ് ഒരിക്കൽ കൂടി മലയാളി പ്രേക്ഷകർക്ക് നൽകിയത് മനസ്സിൽ സൂക്ഷിക്കാവുന്ന ഒരുപിടി നല്ല മുഹൂർത്തങ്ങൾ ആണ്. വിനീത് ശ്രീനിവാസന്റെ മികച്ച പ്രകടനത്തിന് ഒപ്പം ഇന്ദ്രൻസ്, ബേസിൽ ജോസെഫ്, നായികാ വേഷം ചെയ്ത അപർണ്ണ ദാസ്, ദീപക് എന്നിവരും തങ്ങളുടെ ഭാഗം ഗംഭീരമാക്കിയപ്പോൾ മനോഹരം പ്രേക്ഷകരെ എല്ലാത്തരത്തിലും സംതൃപ്തിപ്പെടുത്തുന്ന ചിത്രമായി മാറി.

കുടുംബ പ്രേക്ഷകരുടെ പിന്തുണയോടെ ഇപ്പോഴും പ്രദർശനം തുടരുന്ന ഈ ചിത്രത്തെ നെഞ്ചിലേറ്റിയ എല്ലാ പ്രേക്ഷകർക്കും നന്ദി പറഞ്ഞു കൊണ്ട് മുന്നോട്ടു വന്നിരിക്കുകയാണ് ഇതിന്റെ നിർമ്മാതാക്കളിൽ ഒരാളായ ജോസ് ചക്കാലക്കൽ. അദ്ദേഹത്തിന്റെ വാക്കുകൾ ഇങ്ങനെ, “പ്രിയമുള്ളവരേ, മനോഹരം നെഞ്ചിലേറ്റിയ കേരളക്കരയിലെ എല്ലാവർക്കും എന്റെ വിനീതമായ കൂപ്പുകൈ. ഞങ്ങളുടെ പ്രയത്നം ഫലമണിയുന്നതു കാണുമ്പോൾ അതിയായ സന്തോഷമുണ്ട്. മനോഹരത്തിനു വേണ്ടി അഹോരാത്രം കഷ്ട്ടപെട്ട എല്ലാവർക്കും നന്ദി. എല്ലാത്തിനും കട്ടക്ക് കൂടെ നിന്നു സഹായിച്ച വിനീത് ശ്രീനിവാസനും നല്ലൊരു സിനിമ മലയാള പ്രേക്ഷകർക്ക് സമ്മാനിച്ച ഡയറക്ടർ അൻവർ സാദിഖ്, കഠിനാധ്വാനത്തിലൂടെ അദ്ദേഹത്തിനെ സഹായിച്ച ഫുൾ ടീമിന് പ്രൊഡ്യൂസർ എന്ന നിലയിൽ എന്റെ ബിഗ് സല്യൂട്ട്. മനോഹരം നിങ്ങളുടെ അടുത്ത തീയറ്റേറുകളിൽ പ്രദർശനം തുടരുകയാണ്. എല്ലാവരും കാണണേ, തീർച്ചയായും നിങ്ങൾക്കു ഇഷ്ട്ടപെടും..”.

ഗൾഫിലും കേരളത്തിന് പുറത്തും ഈ ആഴ്ച മനോഹരം വരുകയാണ് എന്നും കണ്ടു അഭിപ്രായം പറയണേ എന്ന് പ്രേക്ഷകരോട് അഭ്യർത്ഥിച്ചു കൊണ്ടുമാണ് ജോസ് ചക്കാലക്കൽ തന്റെ വാക്കുകൾ നിർത്തുന്നത്. സുനിൽ എ കെ ആണ് ഈ ചിത്രത്തിൽ അദ്ദേഹത്തിന്റെ നിർമ്മാണ പങ്കാളി.