ലാലേട്ടന് പിന്നാലെ കയ്യടി നേടി മഞ്ജു വാര്യരും; പരിക്ക് വക വെക്കാതെ ഷൂട്ടിംഗ് പൂർത്തിയാക്കി ലേഡി സൂപ്പർ സ്റ്റാർ

കഴിഞ്ഞ മാസം സോഷ്യൽ മീഡിയ ഏറെ കയ്യടി കൊടുത്ത ഒരു സംഭവം ആയിരുന്നു കംപ്ലീറ്റ് ആക്ടർ മോഹൻലാൽ തന്റെ ജോലിയോട് കാണിച്ച ഡെഡിക്കേഷൻ. വീണു കയ്യിന്റെ എല്ലിന് പൊട്ടൽ സംഭവിച്ചിട്ടു പോലും നിർമ്മാതാവിനേയോ സംവിധായകനേയോ ബുദ്ധിമുട്ടിക്കാതെ നാല് ദിവസം തുടർച്ചയായി ആക്ഷൻ രംഗങ്ങൾ അഭിനയിച്ചു തീർത്തിട്ടാണ് മോഹൻലാൽ ശസ്ത്രക്രിയക്കായി പോയത്. ബിഗ് ബ്രദർ എന്ന സിദ്ദിഖ് ചിത്രത്തിന്റെ സെറ്റിൽ വെച്ചായിരുന്നു ഈ സംഭവം. ഇപ്പോഴിതാ ലാലേട്ടന് ശേഷം ഇതേ ഡെഡിക്കേഷൻ കാണിച്ച മഞ്ജു വാര്യരും ഇപ്പോൾ സോഷ്യൽ മീഡിയയുടെ അഭിനന്ദനം ഏറ്റു വാങ്ങുകയാണ്. രണ്ടു ദിവസം മുൻപാണ് മഞ്ജു അഭിനയിക്കുന്ന ചതുർമുഖം എന്ന സിനിമയുടെ സെറ്റിൽ വെച്ച് ആക്ഷൻ രംഗം അഭിനയിക്കുന്നതിനിടെ തെന്നി വീണു നടിയുടെ കാലിനു പരിക്ക് പറ്റിയത്.

ആശുപത്രിയിൽ എത്തിച്ചപ്പോൾ ഡോക്ടർ നിർദേശിച്ചത് മിനിമം ഒരാഴ്ചത്തെ വിശ്രമം ആണ്. പക്ഷെ പിറ്റേ ദിവസം തന്നെ സെറ്റിൽ എത്തിയ മഞ്ജു വാര്യർ പരിക്ക് വക വെക്കാതെ തന്നെ ഷൂട്ടിംഗ് പൂർത്തിയാക്കുകയായിരുന്നു. നവാഗതരായ രഞ്ജിത്ത് കമല ശങ്കർ, സലിൽ വി എന്നിവർ ചേർന്ന് സംവിധാനം ചെയ്യുന്ന ഈ ചിത്രത്തിന്റെ രചന നിർവഹിച്ചിരിക്കുന്നത് അനിൽ കുമാർ, അഭയ കുമാർ എന്നിവർ ചേർന്നാണ്. യുവ താരം സണ്ണി വെയ്ൻ നായകനായി എത്തുന്ന ഈ ചിത്രം ഒരു ഹൊറർ ത്രില്ലർ ആയാണ് ഒരുക്കുന്നത്. മലയാളത്തിലെ മുതിർന്ന താരങ്ങൾ ആയ, സൂപ്പർ താരങ്ങൾ ആയ മോഹൻലാൽ, മഞ്ജു വാര്യർ എന്നിവർ ഇപ്പോഴും കാണിക്കുന്ന ഈ ആത്മാർപ്പണം പുതിയ തലമുറ കണ്ടു പഠിക്കണം എന്നാണ് സോഷ്യൽ മീഡിയ പറയുന്നത്.